COVID-19: Mizoram dinhmun Hripui vei mi 4 hmuh belh a ni
March 8, Thawhṭanni khan Mizoramah Covid-19 vei mi pali hmuh chhuah a ni a, tualchhunga kai vek an ni. Nimin khan hripui laka fihlîm tawh mi pathum chhuahtir an ni thung.
Covid-19 vei hmuh thar mi palite chu ZMC laboratory-a hmuh chhuah an ni a, Upper Republic-a mite an ni. Mipa kum 28 leh 70 leh, hmeichhia kum 42 leh 56 niin, Mizoram chhunga hri kái an ni a, mahni ina inkhung lainiin, symptom nei an awm lo.
Hripui laka fihlîm tawh, enkawlna hmun aṭanga nimina chhuahtirte chu - SRH-ZMC aṭanga chhuak mi pakhat leh Champhai CCC aṭanga chhuak mi pahnih an ni.
Mizoramah Covid-19 vei mi 4,432 hmuh chhuah a ni tawh a, mipa 3,232 leh hmeichhia 1,200 an ni. Nimin tlai dar 5 thleng khan mi 4,415 (99.62%) chhuahtir an ni tawh a, mi 10 (0.22%) thi tawhin, enkawl mek mi pasarih (0.16%) an awm.
Thawhṭanni khan ZMC laboratory-ah RT-PCR hmangin swab sample 31, TrueNAT-PCR hmangin Lungleiah sample pakhat leh RAT hmangin district 11-ah sample 1,101 endik a ni a; sample endik zawng zawng chu 1,133 niin, chu'ng aṭanga Covid-19 positive hmuh chhuah pali chu 0.35% a ni.
March 8, 2021 thlenga Mizorama swab sample endik tawh zat chu 2,39,090 a ni a, chu'ng aṭanga Covid-19 positive hmuh tawh zat 4,432 chu 1.85% a ni. Hripui vei hmuh tawh zinga mi 2,116 chu Mizoram chhunga kái chhâwng an ni a, mi 2,316 chu Mizoram páwn aṭanga an rawn luh hnua hmuh chhuah an ni thung.
Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,657 hmuh chhuah a ni tawh a, TrueNAT-PCR hmangin 673 leh RAT hmangin 1,101 hmuh chhuah a ni tawh.
Tun dinhmunah hripui vei enkawl mekte chu tualchhung mi vek an ni a; Mizorama district 11 zinga pakua - Lunglei, Siaha, Champhai, Kolasib, Serchhip, Lawngtlai, Mamit, Khawzawl leh Hnahthial district-ahte Covid-19 vei an awm tawh rih lo. Aizawl leh Saitual district-ah chiah hripui vei enkawl an awm tawh a ni.