Lokayukta tan investigation team Din ngei kan tum - Chief Minister

Vigilance department changtu chief minister Zoramthanga chuan, eirûk thubuai chhui tura din Mizoram Lokayukta tan Investigation Wing hranpa din ngei an tum thu Assembly House a hrilh.

ZPM member C Lalsawivunga zawhna kal zelah Chief Minister chuan, Lokayukta-in thil an chhuinaah ACB hmang loa inquiry ti tur a hranpaa siam ṭha an tih thu a sawi a, "Ngaihtuah mek a ni a, siam zung zung theih erawh a ni lo. Anmahnia investigation team an neih theihna atan hma kan la mek," a ti.

Zoramthanga chuan, Lokayukta tana sum dah, a bik takin hlawh tur a tlem chungchanga zawhna chhangin, "A ṭul angin an rawn dil belh chuan kan pe zel ang. An rawn dil zat ang ang erawh a ni kher lo thei," a ti a; Lokayukta sum mamawh dan chu uluk taka ngaihtuah zel a nih tur thu a sawi.

Chief Minister sawi danin, Lokayukta-ah hian pawi khawiha puh chhui chian tur complaint 25 a lut tawh. Pawi khawiha puhte dik leh fel taka chhui chiang turin thuneihna leh zalenna pek an ni.