Maitri Cycle Rally-in Tlabung a thleng
Ramria chengte'n inpumkhatna ṭha an neih a pawimawhzia tlangaupuina atana West Bengal aṭanga thirsakawr hmanga Maitri Cycle Rally neite chuan Tlabung an thleng tawh a, India leh Bangladesh inrìna hrûl hmun hrang hrang an fang mek.
Maitri Cycle Rally hi January 10, 2021 khan ṭan niin, West Bengal state chhung, 24 North Parganas-a Paniter BOP aṭangin sipai 17 leh anmahni buaipuitu mi parukte thirsakawr hmangin an chhuak a, West Bengal aṭangin Assam, Meghalaya leh Tripura an paltlang hnuah February thla khan Mizoram an rawn thleng.
Rally-a telte hian tun kár tìr lam khan rally-a tel tura BSF battalion hrang hrang aṭanga sipai thlante nen Tlabung sub-division an thleng a, Malsury an pan leh mek. March 17, 2021 hian India rama BSF hotu lu ber Director General hoin Kawrpuichhuahah khârna hun hman a ni ang.
Thirsakawr nena zinkawng zawhtute hi BSF 131 Bn commandant KS Nautiyal hoin a thawhpuite leh ramri hrûla khawtlang hruaitute'n an lo dawngsawng. KS Nautiyal chuan, rally chu India leh Bangladesh-a ramria chêng mipuite'n inpumkhatna leh inṭhian ṭhatna an vawn nun theihna atan te, ramri mipui rilrua inrintâwkna tuhna atan te, ramri chhehvela dan phal loh hmanga sumdawnna dona atante buatsaih a nih thu a sawi.
Maitri Cycle Rally hi Sheikh Mujibur Rahman pian champha vawi 100-na puala buatsaih a ni.