MNF President-in ZPM MLA atana Duhoma a pawmzia a tilang - ZPM Ṭhalai

ZPM Ṭhalai chuan thuchhuah siamin, MNF president Zoramthanga thusawiin Lalduhoma chu ZPM MLA a ni tih a pawmzia a lan thu leh, Lalduhoma chu mimal inhuatna vang liau liaua dan a nihzia a lang tih an tarlang.

March 2, 2021-a Serchhipa by-election neih tur campaign hawnnaah Zoramthanga'n mimal inhuatna avangin MLA aṭanga inbàn theih a nih lohzia a sawinaah, 'Mimal inhuatna vànga inbàn theih ni se ZPM MLA zawng zawng bàntir vek kan duh,' tiin a sawi tih ZPM ṭhalaite chuan an tarlang a, "Hei hian Pu Lalduhoma leh ZPM MLA dangte chu ZPM MLA dik tak an ni tih a pawmzia a nemngheh bakah, mimal inhuatna vàng liau liaua Pu Lalduhoma hi bàn an nihzia a tarlang chiang hle," an ti.

Lalduhoma chu ZPM MLA dik tak a nihzia Serchhip bial mipui hmaa puang chhuaktu hmasa ber chu Zoramthanga a ni tih sawiin ZPM ṭhalaite chuan, "A dâwt sawi phawrh langtu dahṭhat a tum vang liau liaua Pu Lalduhoma bàn a nihzia finfiahna ṭha tak chu amah Pu Zoramthanga thusawi vèk hi a ni. Mipui hmaa hmai phih fai a tumna lamah a inṭawng âwk a, buichhia laih lohin a inpuang ta a ni," an ti a; Zoramthanga thusawi leh a chezia chu Serchhip bial mipuiin an hriat thu an sawi.

ZPM Ṭhalai chuan, Lalduhoma héktu MLA 12-te'n MNF president leh chief minister Zoramthanga'n an hêkna a hriatpui loh thu an sawi chu an pú thlavâng hauh duh avanga dâwt sawinaah an puh a, "Hei hi Pu Zorama thusawi hian a nemnghet lehzual," an ti a; kohhran leh chhungkuaa dâwt sawi lo tur leh dikna ṭan tlat tura inzirtirnain politics-a hmun a chan theih lohna chu kalphung hlui zinga mi a ni tih an sawi bawk.