PHE Minister bang turin phut

Mizoram Pradesh Youth Congress Committee (MPYCC) chuan thuchhuah siamin, PHE changtu dy. chief minister Tawnluia chu a chanpual tlin loah puhin, bang turin an phut.

MPYCC chuan MNF sorkar kan hrawn chhung rei loteah mipuiin harsatna hrang hrang an tawk chho zel nia tarlangin, "Congress sorkar laia sum chuang bang ṭhahnem tak an hmang zo titih tawh. Sorkar ruahmanna hmasa-a hmasawnna thawh mek erawh a tam hle thung. Sorkarin sum harsatna avangin tihngaihna a hre si lo a, mipuite hrekna tur chhiah chi hrang hrang leh bill chi hrang hrang a tipung zel a, mipui phurrit nasa tak a siam a ni," an ti.

Mizoram khawpui hrang hrangah tui a harsa tih tarlangin MPYCC chuan, "A bikin, Aizawlah tui namen loin a harsa a ni. Mipui kan mangan em em laiin tui kan hnianghnar zawkna tur ruahmanna leh hmalakna hriat tur a awm si lo. Congress sorkara PHE Minister chak tak hnuaia tui haw hun tur, mipuite hnena SMS a inhrilh thlap thlap thin pawh hriat tur a awm tawh lo," an ti a, eitur nei mah ila, tui in tur kan tlakchham si chuan kan hmabak a thim thu an sawi.

MPYCC chuan tui bill a pun zel laiin tui a vang tual tual nia tarlangin, "Hei hi hriatthiam har kan ti hle. PHE changtu hi Dy.Chief Minister anih avang hian a hna chanpual PHE hi a hnualsuat deuh nge, a ngaihsak ṭha duh lo? Hetianga mahni hna chanpual ngaihsak ṭha peih lo leh tlin lo, bang turin kan phut a ni," an ti.