Hnahthial MJA-in bawrhsap an thlah

Hnahthial DC Vanlalmawia chuan March 8, Thawhṭanni khan a pisaah Hnahthiala chanchinbu mite a kâwm a, inthlahna hun an hmang.

Vanlalmawia chuan, "Hnahthiala ka awm chhungin Hnahthial district tan hian ka tih theih tâwk ka ti a, awm nawn leh dawn pawh ni ila, hetiang baka ṭhaa tih dan ka hre chuang lo," a ti a; hna an thawhnaah famkim lo leh dik lo lai tam tak a awm a rin thu sawiin, "Chu'ngte pawh min khersak loa ṭha taka min thawhpui hi ka lawm hle a ni," tiin, Hnahthial media-te lawmthu a hrilh.

Hnahthiala a awm chhungin district chhunga khua a tlawh kim hman vek thu leh lawmawm a tih thu sawiin Vanlalmawia chuan, "Kan hnathawhnaah hian kan thawh ṭhat leh ṭhat loh te, kan corrupt leh corrupt lohte chu keimahni aiin kan thawhpuite'n an hre chiang zawk a, mahni infak viau lam aiin, mite min hmuh dan hi a pawimawh zawk a ni," a ti.

MJA, Hnahthial Sub-Division president F Zosangliana chuan, Hnahthial DC hmasa ber atan a ngaihna hria an nei chu vannei hle an intih thu sawiin, "A bik takin media mite min ngai pawimawh a, min duhsak hle a, kan lawm hle a ni," a ti a; a hun kal zel tura an duhsakzia lantir nan chanchinbu mite'n ngaihhruihna thuchei an hlan a ni.