Zophaia leilet enkawl dan tur sawiho

Bairabi Zophai-a leilet enkawl dan tur chungchangah nimin khan Bairabi North VC House ah Kolasib DC Dr H Lalthlangliana hoin meeting neih a ni.

Dr H Lalthlangliana chuan Mizoram sorkarin Zophai leh ramri hrul dangah te hmalak tum dan a nei a, chumi inhrilhfiahna leh khairual taka ram neitute nen kal ho theihnan meeting chu neih a nih thu sawiin, "Tun ṭumah hian ramri chungchang kan sawi dawn lo a, kan luah chin tihngheh dan tur leh kan ram tihzauh dan tur kan sawi dawn a, action plan awm sa aṭangin thurawn lak kan duh," tiin ram/leilet neitute chu target an nih thu a sawi.

Kolasib DC chuan ram enkawl dan turah guideline awmsa a awm thu sawiin, "Chumi anga kal turin ram neitute kan ngen. Ram neituten mahni ram enkawl ṭhin ila ramri pawh kan buai lo ang. Hnamdang kutah kan dah a, mahse kan ngam leh ṭhin si lo. Ram kan enkawl tirnaah dan mumal a awm loa, mahni lo a mi a rah pawh kan seng ngam ṭhin lo a ni. Ram neitu, enkawl duh si lo a hnamdang kuta dah ṭhinte chuan an ram sorkar kutah hlan se, Mizo pa enkawl tak tak duhten an chhawr ṭangkai thei zawk ang," a ti.

Central YMA vice president Lalhmachhuana pawhin leilet neituten sorkar ruahmanna siam an zawm a ṭul thu a sawi a, mahni ram chu tlawh fo ṭhin tur leh leilet enkawl tura dah hnamdangte chu chhawr an nihna in hre fo tura hriattir an ṭul tih sawiin, "Kut thlak si loa neitu nihna nei ringawtte avangin hnamdangin kan ram an hauh a, a tawpah hnam angin kan buai leh ṭhin a ni," a ti a, Aizawl pa, Zophaia leilet neitu meeting-a tel lote chu a ṭul angin CYMA in an umzui dawn thu a sawi.

Meeting-ah hian official-te bakah CYMA, MZP Gen. Hqrs., MSU Gen. Hqrs.,  Kolasib Sub. Hqrs. YMA leh Bairabi khawchhung khawtlang hruaitute an tel a, leilet neitute pawh sawm niin, a zatve aia tlem an tel. Meeting chuan Zophai hmuna ram nei, Aizawl mite chu Central YMA lamin lo bawhzui tur leh Bairabi mite chu YMA leh VC te lo bawhzui turin an ti a ni.