Inremna vanga kîr mi 581 an awm Returnee 667 hna pek an ni tawh

Assembly session neih mekah Home minister Lalchamliana chuan ZPM member VL Zaithanzama zawhna ziaka chhangin, India leh MNF inremna avanga ramhnuai aṭanga nunphung pangngaia kîr (returnee) 581 an awm thu a tarlang a, "MNF returnee 667 hna pek an ni tawh," a ti.

Home Minister tarlan danin, returnee 667 zingah hian sorkar hna group B-ah mi 29, group C-ah mi 312 leh group-D ah mi 326-te hna pek an ni. MNF returnee-te chu hna pek vek an ni tawh a, Peace Accord MNF Returnee Association (PAMRA)-in hna pek tur list GAD-a an thehluhte chu hna pek vek an ni tawh.

Sorkar hna pekah hian a tawpna atan December 2018-ah mi 13 hna pek an ni a, chungte chu assistant-ah pakhat, UDC-ah pathum, LDC-ah pali leh group D-ah panga dah an ni. Mizoram Peace Accord-a thu inziak zinga pakhat, para 12 (iii)-a 'Mizoramin ama pualin a duh chuan High Court a nei thei ang' tih chiah tihpuitlin loh a la nih thu tarlangin Lalchamliana chuan, "Tunah hian Gauhati High Court, Aizawl Bench kan nei tawh tho a, hemi hian kan mamawh ang chu min phuhru rih. Sum lam sên belh tur harsatna nen mahnia High Court nei tur hian hmalak a la ni rih lo," a ti.

Home Minister chuan, 'Hnam pasalṭha leh martar chhungte tan eng ang special scheme nge siam tum a nih,' tih zawhna chu, 'Tun maiah chuan special scheme siam tumna a awm hman rih lo' tiin a chháng.