Mi kutthlak rawntu mi pali man an ni

Aizawl veng pahniha tlangval palite'n June 21, 2019 zan khan Chanmari kâwn traffic point bulah mi kut an thlâk rawn a, kut an thlak zinga pakhat, Chanmari Presbyterian kohhran upa chu damdawi-inah hruai a ni. He thil thlengah hian Aizawl Police Station-ah FIR thehluh a ni a, kutthlaktu mi palite chu police-te'n an man tawh.

Police aṭanga thu dawn danin, mi kutthlak rawntu mi palite chu - Ramhlun South veng mi pahnih Lalchhuanmawia (23) s/o Hmingthanvawra (L) leh Lalawmpuia (21) s/o Lalrinpuia te, Biakthansanga (20) s/o Lalnunkima, Lunglei Rahsi Veng (Ramhlun South-a khawsa mek) leh, Lalsangliana (23) s/o MC Thangpuia, Ramhlun Venglai te an ni.

June 21, Zirtawpni zan dar 11 vel khan mi palite hian Chanmari kâwn traffic point bulah mi pakhat an sawisak rawn a, an thâwm hriain a bul hnaia awm val upa leh mi dangte an kal khawm a, a thleng hmasa Lalsawmkima (45), Chanmari Kohhrana kohhran upa chu an lo sawisa ve nghal a ni. Lalsawmkima hi a hnâr ruh a tliah avangin Inrinni khan Ebenezer Hospital-ah zai a ni a, damdawi-inah enkawl mek a ni.

Mi sawisak rawntu mi palite lakah hian Chanmari Branch YMA chuan Aizawl PS-ah FIR an thehlut a, Aizawl PS-ah hian Indian Penal Code 341/325/323/34 leh Mizoram Liquor Prohibition Act 6(3) tlawhchhanin thubuai Aizawl PS case no. 210/2019 dt.22.06.2019 ziah luh a ni.

Superintendent of Police, Aizawl chuan, kut inthlak rawn leh insawisak rawn ang chi reng reng chu Aizawl district police-te'n thubuai siam turin hmalak zel an tum tih tarlangin, "Mi tin fimkhur turin kan inhriattir a ni," a ti a; criminal record neite tan hna dilna/employment, passport dilna leh thil hrang hrangah harsatna nasa tak an tawh theih avangin, criminal case nei lo tura fimkhur turin mi tin a chah.

Thil thleng chungchangah hian YMA, Chanmari Branch chuan Inrinni khan thuchhuah an siam a; an Branch YMA Execuitive Commitee mem-ber ni lai leh Chanmari Kohhran upa Lalsawmkima kutthlak rawn a ni chu an dem thu an tarlang.

Chanmari Br. YMA chuan, "June 21 zan dar 11:30 vela tlangval pali two wheeler khalha Chanmari Kohhran biak-in bula wrong side-a tlânte'n police two wheeler-a chuang an tibuai a, ṭhelh tuma bán phartu Pu Lalsawmkima, Chanmari YMA Executive Member ni lai, OB hlui leh Chanmari Kohhran Upa ni bawk chu tlangval palite hian hnár ruh tliak khawpin na takin kut an lo thlak a ni. Hei hi ná kan tiin kan la thutak hle a ni," an ti.

Chanmari Branch YMA chuan, tunlaia tleirawl leh ṭhalai ṭhenkhatte'n mi sual rawn a, kutthlak an chíng chu an vei hle tih sawiin, "A huhoa mi kutthlak ṭhinte hian an thil tih ṭha lo tak sim tawh se tih hi kan duh a, a bik takin Chanmari veng mi leh sa chunga kutthlakna hi tun hnuah thleng tawh lo se kan duh," an ti a; thil ṭha lo a thleng leh a nih chuan, a ṭul ang ang hmachhawn turin Chanmari veng mipui an inpeih thu an tarlang a ni.