New Market main building sak ṭhat dan tur Commerce & Industries Minister-in a enfiah

Commerce & Industries minister Dr R Lalthangliana chuan June 22, Inrinni khan New Market main building a tlawh a, sak ṭhat dan tur a enfiah. New Market main building hi Aizawl District Disaster Management Authority (ADDMA) chuan him tâwk tawh loah a ngai.

Dr R Lalthangliana chuan, New Market enkawltu sorkar official-te leh Bazar Sumdawng Pawl hruaitute nen Commerce & Industries site office-a an inkawmnaah thu sawiin, "Sorkar chuan ngun takin thil a ngaihtuah hmasa a, tuna sorkar thuchhuahte pawh hi kan zavaia himna tur leh a kawng awmchhun nia hriat a ni. Chhungkaw sang têl sumdawnna a khaihlak hret tur hi thil hrehawm tak a nih rualin, chhiatna lian zawk, nunna tam tak hloh theihna kan pumpelhna tur kawng a ni," a ti a; sumdawngte chu sorkar ruahmanna hrethiam turin a ngen.

Sumdawngte chuan, bazar chu an eizawnna leh chhungkaw innghahna ber a nih thu te, building thar sak hunah seat chan loh an hlauh thute leh an harsatna sorkarin hriatthiampui se an duh thute an sawi. Commerce & Industries Minister chuan sumdawngte thil sawi chu chhângin, ṭha zawk, him zawk leh tu leh fate tana rotling siam a ṭul thu a sawi a, "Seat chan loh chu thil hlauhthawnawm a ni lo. Bazar building hluia seat nei zingah anmahni duh thua an sumdawnna tihtawp duh an awm a nih ngawt loh chuan tuna seat neite hian an neih leh ngei sorkarin a duhsak a ni," a ti.

Bazar building hlui chu ṭhiaha sak ṭhat ngawr ngawr sorkarin a ngai pawimawh ni loin, bazar chhunga ni tina ṭhu, sumdawngte bakah anmahni dawrtute himna tur ngaih­tuahna vang zawk a ni tih sawiin R Lalthang­liana chuan, "Tuna bazar building hluia awm zawng zawngte chu building thar sak zawh a nih hma chuan hmun khatah dah khawm vek theihna tur hmun a awm lo," a ti a; AMC lam nen ṭanghoin a remchang anga seat pek vek an nih dawn thu a sawi.

Minister hi bialtu MLA Robert Romawia Royte, MLA dang pathum - VL Zaithanzama, C Lalsawivunga leh C Lalmuanpuia te, chief secretary Lalnunmawia Chuaungo te, PWD leh Commerce & Industries hotute'n an ṭawiawm.

ADDMA chuan June 8, 2015 khan zir chianna a neih behchhanin New Market main building chu him lo leh luah tlak lohah a puang tawh. Building-a sumdawngte chu kum 2015 leh 2017-ah chhuak tura tihna lehkha pek a ni tawh a, Inrinni khan a ṭum thumna atan pek leh a ni. Tun dinhmunah, building-ah hian sumdawng ṭhu nghet mi 1,073 an awm a, eng emaw chánga inzuarte nen mi 2,000 chuang an ṭhu ṭhin a ni.