MPCC-in 2019-20 budget zirhona buatsaih

Mizoram Pradesh Congress Committee (MPCC) Media department chuan June 21, Zirtawpni khan Lal Thanhawla Auditorium, Aizawlah Mizoram budget 2019-2020 zirhona an buatsaih. Resource person Lalsawta, Finance minister hluiin thu a sawi a, sawihona leh zawhna leh chhanna hun hman a ni.

Lalsawta chuan, India Con­stitution Article 202(1), Article 203(3) leh Article 205(1)-ahte sorkar sum luhna zawng zawng leh hmanna zawng zawng mipui hriat turin state legislative assembly-a pharh ngei tur leh Governor remtihna lak ngei phut a nih thu a sawi a, "India ram chu khawvel ram dang anga thil man tona (inflation) a san ve vak loh ṭhin avangin budget hi a sual tam lo viau ṭhin," a ti.

Congress sorkar laia sum renchem taka an kalpui chuan finance management-ah nasa takin hmasawnna a thlen tih sawiin Lalsawta chuan, "Economic measure (sorkar inrenchemna) kalpui a nih a, kum 2015-16 aṭanga khan Year of Consolidation kan hmang a, chu chuan state sorkar sum harsatna a sukiang nasa hle a ni," a ti a; sorkar hnathawkte GP fund pawh harsatna awm loa pek chhuah theih a nih thu a sawi.

Finance Minister hlui chuan, political party hrang hrangin ngaih pawimawh bik leh tih ngei duh an neih ṭhin avangin, sum dah dan azirin sorkar policy leh programme thui tak hriatthiam theih a ni tih a sawi a, "2018-2019 budget-a Congress sorkarin a taka department hrang hrang hnathawhna tur, major works atan sum tam tak a dah ang kha tun budget-ah hian an dah ve ta lo a, an dah chhunah pawh an dah tlem hle. Congress sorkar lo thawh tawh kha a tâwk an ti viauah a ngaih theih," a ti.

Lalsawta chuan, GAD-ah financial year hmasa 2018-19 ah major works atan cheng nuai 5,920 dah a nih laiin 2019-20 budget-ah chuan nuai 660 chauh dah a nih thu te, School Education hnuaia major works-ah 2018-19 atan nuai 2,300 dah a nih laiin, 2019-20 ah nuai 500 chiah dah a nih thute a sawi a; hna thawhna tur an dah tlem avangin sorkar sum indaih lohna (deficit) pawh a lan tlem phah tih a sawi.

Kum 2019-20 Mizoram budget-a state sorkarin sum lak luhna tura a tarlan tam tak chu an beisei sang lutuk deuha a hriat thu sawiin Lalsawta chuan, "P&E aṭanga sum hmuh tur nikum lam aia nuai 10,129.52-a a tam zawkte hi electric bill a lêtin an tipung dawn a nih loh chuan a harsa ang. Central aṭanga sum hmuh tura beisei pawh an beisei sang lutuk deuh niin a lang," a ti.