INTACH Mizoram hotute'n Raj Bhavan an tlawh

INTACH Mizoram Chapter hruaitute chuan June 21, 2019 khan an convener P Rohmingthanga, co-convener pahnih C Chawngkunga leh Rin Sanga te hoin Raj Bhavan complex chhunga heritage building, tun hmaa Bawrhsap In tih ṭhin chu an tlawh.

INTACH hruaitute hi Governor secretary K Lal­thawmmawia leh thawktu dangte'n an lo dawngsawng a; Raj Bhavan-a heritage building chungchanga  INTACH hmalaknate meeting room-a an inhrilhfiah hnuah, building chu chip chiar takin an fang a ni. Compound wall-a Governor hlui, Lt.Gen. Nirbhay Sharma-a'n awmze nei leh mawi taka ‘fiber glass’ hmanga Vangchhiaa lungphun hrang hranga milem awmte ang tak a siamtirte chu ṭha an tih thu an sawi.

INTACH hotute sawi danin, Raj Bhavan building hi British hun laia Bawrhsap In (Bungalow) a ni a, Lushai Hills District-a bawrhsap hmasa ber Maj. J Shakespear, Mizote'n Tarmita an tih maiin kum 1898-99 chhunga a sak a ni. Chu in chu union territory nih laia Lieutenant Governor leh state nih hnua Governor-te chenna atan hman zui a ni a; a hmunhma chu zauh belh ni mah se, a tira building chu tihdanglam a ni lo a, a lung bang erawh plaster thar a ni thung.

Bawrhsap In chu Aizawla heritage building langsar ber a nih avangin, INTACH rawtna zûlzuiin kum 2008 khan Mizoram Ancient Monuments and Archaeological Sites and Remains Act, 2001 (MAMASR Act) hnuaiah hmun/thil dang 48 nen 'protected monument' atan sorkarin a puang.

Lt.Gen. MM Lakhera-a'n Governor a nih laiin Raj Bhavan pumpui sak ṭhat a duh avangin Raj Bhavan chu protected monument list aṭangin a paihtir a; chu chu INTACH-in an hriat veleh Mizoram sorkar leh New Delhi lamah objection an siam. Chumi hnuah MM Lakhera chuan, design siam dan chungchangah INTACH a pun a; INTACH chuan building sak ṭhat a nih dawn chuan, 'heritage character' paih loa a lan dan ngai anga sak ṭhat (restoration) an remtih thu an lo hrilh.

Governor thar Lt.Gen. Nirbhaya Sharma chuan INTACH duh dan ngai pawimawhin, building veran­dah design te, a lung bang (stone wall) te, a chung awm dante leh a chim­ney-te chu a ngai ang chiahin a siamtir ta a ni.