State sorkar leh Home department Ramrî pawm dan a inang lo

Mizoram Sorkarin flagship programme SEDP-ah ramri atan North East Bengal Frontier Regulation, 1873 a pawm thu tarlan a nih laiin, Home minister chuan ramri chungchang chu zir chian mek a nih thu ziakin zawhna a chhang.

Nimin Assembly session-ah INC member Zodintluanga chuan hei hi sawi chhuakin, Mizoram ramri chungchangah Mizoram sorkar leh Mizoram sorkar hnuaia Home department-in ngaihdan inang lo a nei chu tichiang tura a phut thu a sawi.

Zodintluanga tarlan danin, SEDP-ah hian Mizoram leh a ṭhenawm ramte'n ramri buai an neih thu leh ramri buai chuan inthahna, inrûkbona leh pawi sawi lote tih hlauhthawnnate a thlen thu tarlan a ni. Mizoram sorkar chuan ram chán si loin ramri buai chingfel turin theihtawp a chhuah dawn thu SEDP-ah tarlan a ni a, 'Sorkar chuan state ramri atan North East Bengal Frontier Regulation, 1873 a pawm a ni,' tih a ni.

INC member C Ngunlian-chunga zawhna Home Minister-in ziaka a chhan dan chuan, Mizoram leh Assam-in ramri buai an nei a, Mizoram sorkarin Mizoram leh Assam ramria a pawm tur chin chu zir chian mek a nih thu a chuang.

Zodintluanga thusawi chungchangah hian Home Minister chuan, SEDP-a ramri chungchang inziak chu a la hmuh ve loh thu a sawi a, "Home lam chuan ramri Mizoram sorkarin a pawm kan la nei lo. Zir chiang tur ruat a ni a, document hrang hrang an la khawm a, an la peih fel lo," a ti.

MNF member Dr Vanlalṭanpuia zawhna chhangin Home Minister chuan, Immoral Traffic (Prevention) Act tlawhchhanin Mizoramah mihring rûkbo thubuai pakua ziah luh a nih tawh thu House a hrilh. Lalchamliana chuan, Mizo­ramah mihringa sumdawnna (human trafficking) tibo turin sorkarin hmalakna hrang hrang a neih thu a sawi a, "Aizawl, Lunglei, Kolasib leh Champhai district-ahte Anti-Human Trafficking Unit din a ni. State leh district level training buatsaih ṭhin a nih bakah, sikul, college leh zirna-in hrang hrangah awareness neih ṭhin a ni," a ti.

ZPM member VL Zai­thanzama zawhna Home Minister-in a chhan danin, tun dinhmunah Mizoram Police-ah hna ruak 2,853 a awm a, chu'ngte chu group A-ah 28, group B-ah 224, group C-ah 2,454 leh group D-ah 147 a ni.