Vangchhia-a thil hlui hmuhchhuahte Mizo hnam ṭhenkhat sûlhnuah ngai

Art & Culture minister R Lalzirliana chuan, Vangchhia khuaa hmanlai thil hlui hmuh chhuahte chu Mizo hnam ṭhenkhat thlangtla hmasate sûlhnu nia ngaih a nih thu ZPM member Lalduhoma zawhna chhangin a sawi.

R Lalzirliana chuan, Art & Culture department leh Indian National Trust for Art & Culture Heritage (INTACH), Mizoram Chapter-te hmalaknain Vangchhia-ah January 2016 aṭanga kum 2019 thlengin sorkar laipuia Archaelogical Survey of India (ASI) hmalaknain, ASI Aizawl Circle chuan archaelogical excavation ṭum thum an nei tawh tih a sawi a, "An thil laih chhuah leh zir chianna aṭang chuan, Mizo hnam ṭhenkhat thlang tla hmasate sûlhnu nia ngaih a ni," a ti.

Lalduhoma'n Mizo hnam ṭo bul zir chian a sawi chungchangah Art & Culture Minister chuan, "Mizo hnam ṭo bul chhui turin thil tam tak ngaihtuah a ngai a ni," a ti a, tun hnai maiah chuan hnam ṭo bul chhui tur din a awm hran loh thu a sawi.