Zirtirtu pakhat chauh awmna primary school 53 a awm

Mizoram sorkar hnuaia district parukah primary school 812 a awm a, zirtirtu 2,717 an awm. Zirtirtu pakhat chauh awmna sikul 53 a awm a, zirtirtu pahnih chauh awmna sikul 184 a awm bawk. Aizawl district-ah zirtirtu pakhat chauh awmna sikul pali a awm a, Serchhip district-ah zirlai 100 chuang awmna sikul a awm lo.

Vanglaini-in RTI Act hmanga a zawhna School Education department SPIO-in a chhan danin, district council huam chhung tel loin district parukah primary school (P/S) zirtirtu awm tlem zualna, zirtirtu pakhat leh pahnih chauh awmna sikul 237 a awm a (zirtirtu pakhat awmna P/S 53 leh zirtirtu pahnih awmna P/S 184); P/S 812-ah zirlai 36,334 an awm a, mipa 18,554 leh hmeichhia 17,780 an ni.

District paruka P/S 812-ah zirtirtu 2,717 awmin, mipa 1,171 leh hmeichhia 1,546 an ni a; hmeichhia 375-in an tam zawk. Serchhip district-ah zirlai an tlem zual a, zirlai 1,905 an awm a, Kolasib district-in dawtin, zirlai 4,112 an awm.

Aizawl district-ah zirtirtu pakhat chauh awmna P/S pali leh zirtirtu pahnih chauh awmna P/S 44 a awm a, Champhai district-ah zirtirtu pakhat awmna P/S 12 leh zirtirtu pahnih awmna P/S 37 a awm. Kolasib district-ah zirtirtu pakhat awmna P/S pakhat leh zirtirtu pahnih awmna P/S 19 awmin, Lunglei district-ah zirtirtu pakhat awmna P/S 26 leh zirtirtu pahnih awmna P/S 36 a awm a, Mamit district-ah zirtirtu pakhat awmna P/S pariat leh zirtirtu pahnih awmna P/S 25 a awm. Serchhip district-ah zirtirtu pakhat awmna P/S pahnih leh zirtirtu pahnih awmna P/S 23 a awm bawk.

Aizawl district bika zirtirtu pakhat chauh nei zinga mi, Bawlte P/S-ah chuan zirlai 27 an awm a; zirtirtu pakhat chauh neihna P/S pathum - Lungsai P/S-ah zirlai pariat, Sumsuih P/S-I ah zirlai 35 leh, Hlimen P/S-II ah zirlai pasarih an awm. Hetih lai hian, Aizawl khawpui chhungah zirlai 30 vel leh a aia tlem hret awmnaah zirtirtu 4-6 awmna P/S eng emaw zat a awm thung.

Aizawl district bikah sorkar P/S 268 a awm a, zirlai ngah ber Bawngkawn P/S-II in zirlai 180 an nei a, zirtirtu pariat an awm. Thingtlang P/S ṭhenkhat zirlai 80 chuang awmnaah zirtirtu pathum an awm a; Aizawl khawpuia sorkar P/S zingah zirlai 33 te, 38-te awmnaah zirtirtu paruk awmna a awm nual. Saitual P/S-II ah chuan zirlai 58 awmin, zirtirtu pasarih an awm a; Muallungthu P/S-I ah zirlai 33 awmin zirtirtu pariat an awm a, zirtirtu pakhatin zirlai 4.125 an enkawl ang a ni.