KHAWTHLIR

Keifang Joint YMA chuan YMA Day pualin nimin khan an khaw community hall-ah 'Thisen pek rûnpui' an huaihawt a, Aizawl Civil Hospital tan thisen unit 196 an pe a, thisen petute mipa 154 leh hmeichhia 42 an ni. Keifang Joint YMA hian kum 2007 aṭangin kum tin YMA Day pualin thisen an pe ṭhin a, YMA branch zingah kum khata thisen pa tam ber lawmman pawh an lo la tawh ṭhin a ni.

Mamit DC Dr Lalrozama hoin nimin khan DC conference hall-ah Prime Minister-in khaw tina village council president-te lehkha a thawna a tarlan angin tuihna humhalh, tui renchem leh tui khâwl khawm dan tur sawiho a ni. Mamit DC chuan, India ram hmun hrang hrangah tui a harsat thu sawiin, "Ṭhenkhat phei chu tui in tur tak ngial pawh an tlachham tawh. Mizo-ramah chuan tuihnâ kan la nei ṭha a, kan tuihnate hi humhalh zel a ṭul a, ruahtui kan khâwl pawh a ṭul a ni," a ti.

Traffic SP chuan thupek chhuahin, June 24, 2019 aṭangin Chanmari West kawipui aṭanga Vaivakawn, Hunthar Veng pêng inkar kawng siam ṭhat hna thawh a nih dawn avangin, zing dar 9:30 aṭanga tlai dar 5 inkarah lirthei tlân phal a nih loh thu a tarlang. Thupek hian kawng siam zawh hma zawng a huam ang.

Lawngtlai District Task Force Immunisation chu nimin khan DC conference hall-ah SDO (Sadar) Rochuangkimi Khenglawt hoin an ṭhukhawm a, an district-a rotavirus hri danna (vaccine) pek dan tur an sawiho. Meeting-a tarlan danin, rotavirus (RV) vanga kawṭha­lo thleng chu khawvel puma hri léng a ni a, ram tam tak ­chuan Rotavirus Vaccine kalpuiin an hlawhtlinpui tawh. Kawṭhalo pangngai leh RV vanga kawṭhalo chu hriat hran a har a, damdawi hranpa a la awm loh avangin RV vaccine lak chu invenna awmchhun a ni rih.

Planning & Programme Implementation-in June 18, 2019 aṭanga entepreneurship lama tuimite tana training an buatsaih ‘Certificate Program in Entrepreneurship’ chu nimin khan department conference hall-ah 

khar a ni.