MZU degree result-ah 100% nei HATIM

Mizoram University (MZU)-in kumina undergraduate course final year/semester exam result June 20, 2019-a a tihchhuah tâkah Higher and Technical Institute, Mizoram (HATIM) chuan result an nei ṭha ber a, Arts leh Commerce-ah an zirlaite an pass vek ve ve a, 100% result nei awmchhun a ni. Chutih laiin, result nei ṭha lo berte chu Arts-ah Lawngtlai College, Science-ah Lung­lei College, Commerce-ah Govt. Aizawl College-te an ni.

Mizoramah Arts subject-te zir theihna college 21 a awm a; pass percentage-a chhûta result nei ṭha ber HATIM-ah chuan zirlai exam 20-te an pass vek a ni. Pass percentage ṭha ber dawttu chu Pachhunga University College (PUC) niin, zirlai 381 zinga 347 (91.08%) an pass a; pathumna Hrangbana College-ah pass percentage 76.30% a ni a, zirlai 422 zinga 322 an pass.

Arts-ah hian Lawngtlai College chu a tichhe ber an ni a, an zirlai exam 112 zinga 27 pass in, pass percentage chu 24.11% chauh a ni. Pass chhe zual dang zingah - Hnahthial College-ah zirlai 28 zinga 11 (39.29%) an pass a, Saiha College-ah zirlai 87 zinga 35 (40.23%) an pass bawk.

Science stream-ah chuan Kolasib College pass percentage a ṭha ber a, zirlai 13 zinga 10 pass in, pass percentage 76.92% a ni a, zirlai erawh a tlem thung. Pass ṭha ber dawttu PUC-ah zirlai 255 zinga 185 (72.55%) an pass a, anni hian subject topper an kawl deuh vek a ni. Science zir theihna college paruk zingah Lunglei College pass percentage a hniam ber a, zirlai 53 zinga 28 (52.83%) an pass.

Mizoramah Commerce zir theihna College pali a awm a; chu'ng zinga private college awm­chhun HATIM-ah candidate 29-te an pass vek (100%). Pass percentage san zawngah HATIM hi PUC-in an dawt a, zirlai 49 zinga 45 (91.84%) an pass. Hrangbana College-ah 79.56% leh GAC-ah 65.96% an pass bawk.

B.Sc. (Home Science) chu Zirtiri Residential Science College-ah chiah zir theih a ni a, zirlai exam 27 zinga 20 pass in, pass percentage chu 74.07% a ni.