Aizawl Smart City Ltd. hawn a ni

Nimin khan Secretariat Conference Hall-ah Aizawl Smart City Ltd. hawn a ni. UDPA secretary Dr C Vanlalramsanga chuan, Smart City kalpuinaah Aizawla chêng mipui hamṭhatna hre reng chunga hna thawk turin kalkhawmte a fuih.

Dr C Vanlalramsanga chuan, Smart City atana hnathawhnaah hmasawnna ruhrelte chu mipuite khawsak phung chawi kâng tur a nih thu sawiin, "Mizoramah chuan Aizawl atan chauh hna thawh a nih avangin khawpui dangte entawn theih tura kalpui a ngai. Smart City hi kum nga 2015-2020 chhunga thawh tur a nih angin, muangcháng loa chak taka hna thawh a ṭul a, line department zawng zawngte nen thawhhona ṭha neih a pawimawh," a ti.

Smart City ruahmanna hi inelna anga kalpui a ni a, a hmasa ber chu kum 2015 khan kalpui niin, Aizawl chu ruahmanna tel turin June 25, 2017-ah thlan a ni. Smart City-in a tum ber chu - khawpuia cheng mipui hnena changtlung zawka tui (water supply), êng (street lighting), tui luankawr (drainage system), traffic, veivahna (transportation), motor parking, chenna in (housing), bazar siam, bawhhlawh senghawi, hriselna, zirna leh khawpui mamawh turte buatsaih a ni.

Smart City atan hian cheng vbc. 2,053.01 ruahman a ni a; Aizawla Smart City hmalakna tihlawhtling turin Chief Secretary kaihhruaina hnuaiah State Level High Powered Committee din a nih bakah, a hnuaiah UDPA Secretary kaihhruai Aizawl Smart City Limited (ASCL) Board of Directors din leh a ni.