House-a zawhna leh RTI zawhna Chhan dan inang loa puh a ni

INC member Zodin-tluanga chuan March 20, 2019-a unstarred hmanga a zawhna chhan a nihin Sports department hnuaia work order cancel a awm loh thu tarlan a nih laiin, RTI Act hmanga an zawhna chhan a nih danah chuan work order 10 cancel a nih thu leh party mite pek an nih thu tarlan a ni tih a sawi. 

Hemi chungchangah hian Sports Minister Robert Romawia Royte chuan, "Contractor hmuh zawh loh avangin an pek dan ṭhin thoin pakua nge 10 a diltute hnenah kan pe. Party lam ngaihtuah loin a thawkzo tur ngeite hnenah kan pe," a ti a, Zodintluanga chu unstarred hmanga a zawhnaah 'Party mi pek an ni em?' ti zawnga zawhna zawt a nih leh nih loh en chiang leh turin a ngen.

Zodintluanga chuan contract an cancel sakte chu VCP-te an nih thu leh work order cancel-nate an dawn thu a sawi chungchangah Robert Romawia chuan, information chu department lam aṭanga a dawn dan a nih thu sawiin, contract chungchang chu a chhungril sawi tur a tam thu a sawi.

ZPM member Dr Vanlalthlana zawhna chhangin Sports minister Robert Romawia Royte chuan, sorkarin indoor stadium leh field a neihte hman dan tur duan mek a nih thu House a hrilh a, Aizawl chauh ni lo district dangah pawh sorkarin infiamna hmunhma a neihte hmang duh an tam ṭhin thu sawiin, "Indoor stadium leh field-te a hman dan tur mumal taka siam turin hmalak mek a ni. A hman mante lak ve a ṭha em tih chungchangah Finance department lamte rawn chungin tih a ngai," a ti.