Zirnaah politics a inrawlh tur a ni lo - Education Minister

School Education minister Lalchhandama Ralte chuan, zirnaah party politics a inrawlh tur a nih loh thu sawiin, zirtirtu 946 an lak tur result lo en turin House member-te a sawm.

Thawhṭannia a depart-ment chan hrang hrangte demand sawihona a khaikhawmnaah Edu-cation Minister chuan, "Eng hna lakah mah Hnam Run list a awm ngai lo. Tuna hna thar kan lak tur pawh hi a result-ah lo en rawh u. Education-ah party politics a tel tur a ni lo. Tun sorkar thar hian zirna lam a ngai pawimawh hle a, thla  ruk emaw awrh chauh sorkar a la kal tihin hna 1,120 lak phalna min pe tawh," a ti.

Lalchhandama chuan hna lak turah mipuite zirtirna dik lo leh him lo pe lek lek theia thusawi an awm ṭhin thu sawiin, "He hna lak turah hian MTET nei hlei hlei hi kan duh a, chutih laiin relaxation siam loh theih lovin MTET nei, employment exchange-a inziak lut hi 149 chauh kan nei a ni," a ti a, MTET zingah zirtirtu hna nghet thawk mek leh RMSA leh SSA-a thawk mekte an awm thu a sawi.

Education Minister chuan MPSC hna lak a muan ṭhin avang leh zirtirtu indaih lohna a nasat tawh avangin zirtirtu 946 hi MPSC kaltlang loa lak an nih tur thu sawiin, "Hmanni maia zirtirtu 150 lak tharte kha July, 2017-a Cabinet-in a phalsak tawh an ni. Kum thum deuh thaw chhungin zirtirtu 150 an la fel hman chauh a ni," a ti.

Thingtlang thleng phak zirna an ngaih pawimawh thu sawiin Lalchhandama chuan, "Party kan sawi loa, party mi lak kan tum hek lo. Zirtirtu, a khaw mi ngei lak kan tum mai a ni. A khaw mi ngei lak tur an awm lohna hmunah chuan an khaw ṭhenawm emaw, an district chhung a mi emaw kan la dawn a ni. Hei hian zirtirtu mahni hnaa awm ṭha duh lo leh aikal lak a tihziaawm ngei kan ring," a ti.

Education Minister chuan exam dan leh question siam dan pawh tihdanglam tum a nih thu sawiin, "Naupangte thiam­na tak tak cho chhuak tur, by heart system leh zirlaibu ringawta innghat lo thiam­na pawchhuak tur lam hawi zawngin her rem tum a ni," a ti a, zirlaibuah nationalism, hnam zia rang lam hawi leh nu leh pa hmangaihna leh aia upa zahna lamhawite pawh telh thar tum a nih thu a sawi.

Lalchhandama chuan Hindi zirtirtu 1305 sorkar hmasain a ban takte laklet leh dan sorkarin a zawng mek zel tih sawiin, "Chief Minister bakah senior minister Dr Thangtea leh kei ngei pawhin Hindi teacher ban takte laklet leh an nih theih nan hma kan la mek zel a ni," a ti.