KHAWTHLIR

Aizawl District Court-a Senior Civil Judge-III court-in June 17, 2019-a MHIP General Headquarters-a office bearer-te a ṭhiahna leh seal zawng zawng court-a thehlut tura a tihna order chu nimin khan Gauhati High Court, Aizawl Bench-in a ṭhiat (suspend). Hemi chungchangah hian High Court judge Justice Michael Zothankhuma chuan nimin khan order a chhuah. MHIP case hi June 27 hian a ngaihtuah leh dawn a, chutah chuan MHIP Gen. Hqrs.OB thlanna a awm theih dan tur ngaihtuah a ni ang.

Mamit Bazar Venga Children Sanitation Club (CSC)-te chu June 24, Thawhṭanni tlai khan an hnatlang a, Mamit khawpui chhung kawngpui dung leh bazar hmuna bawlhlawhte an chhar khawm. Hnatlang hi Mamit district-a Swachh Bharat Mission (Gramin) ambassador Laltharzeli'n a kaihruai a; CSC member mi 50 vel an hnatlang a ni.

Sports minister Robert Romawia Royte chuan thuchhuah siamin, India hockey player Lalremsiami chu a pa Lalthansanga Zotein a thihsan avanga a tawrhpui thu leh Japan-a khelh zawh tak FIH Womens Hoc-key Series-a an champion avanga a lawmpui thu a tarlang.

Mizoram Cooperative Fish Farming Marketing and Processing Federation Ltd. (ZOFISFED) chuan, nimin khan Chanmari YMA Hall-ah Annual General Assembly vawi 17-na an hmang a, Cooperation department-a additional registrar Lalrinsanga'n a hmanpui. Inkhawmpui hi Federation chairman F Lalnienga’n a kaihruai a, special resolution pakhat, 'Kumin 2019-20 chhung ngei hian Zofisfed Ltd. office leh kudam mahni ta ngei neih ni rawh se' tih chu an pawm a ni.

Serchhip bawrhsap Sangchhin Chinzah chuan thupek chhuahin, fûr ruahtui tlak tam zual chhung June - September inkarah leimin a tam ṭhin avangin thla li chhung an district chhungah lei laih a khap a, “Loh theih loh vanga lei lai turte chuan DC pisa aṭangin phalna lak hmasak tur a ni,” a ti.