Myanmar ráltlante thawn lêt rih lo

Nimin, June 25 kha Lawng­tlai district-a Myanmar mi raltlan la chám bángte an ram lama thawn lêt hun atana tih a ni a, mahse, thawn lêt an ni rih lo a, thawn let loh chhan puan a ni lo.

Thu dawn danin, Lawngtlai district chhim lama India leh Myanmar ramri hnaih, Myanmar ram chhung velah kum 2017 tàwp lam aṭangin Myanmar sipaite leh hel pawl Arakan Army-te an inkah avangin sahimna zawngin Myanmar khua leh tui (Zakhai hnam) eng emaw zat chu Mizoramah an rawn ráltlân a, Hmawngbuchhuah leh a chheh­velah an inbéngbel a ni.

Zakhai hnam ráltlante chu sorkar chuan June 15, 2019-a Myanmar rama thawn kîr turin ruahmanna a siam. Mahse, ruahsûr duh lai leh khawchhiat lai a ni a, humanitarian ground (mihring mihrinnaa inzah tawnna) aṭanga thlirin, a hun sawn hlat mai an rél a; June 25, 2019-a thawn let tura tih a ni.

Nimina thawn lêt tura lo tih tawh a ni chunga thawn lêt an nih loh chhan hi hriat chian theih a ni lo. Home department hotute chuan ṭhulh a nih leh chhan an hriat loh thu leh, nimin lamah pawh Lawngtlai DC an biak pawh theih loh thu Vanglaini an hrilh. Lawngtlai lam aṭanga thu dawnna chuan, raltlante an lêt a, Myanmar lama lo dawngsawngtu tur lam an la inpeih loh vang a nih theih thu a sawi bawk.

Ráltlante chu Myanmar lama thawn let an nih dawn chuan, ke-in km. 2-3 vel an kal a ngai dawn a; fûr tui tam lai chuan Sekulh lui leh Varang luiah lawngléng hmangin a kal theih a ni. Myanmar aṭanga sahimna zawnga India/Mizorama rawn tlân lut, tun thlenga la chambángte chu Assam Rifles leh Central YLA-te chhinchhiah zat a inang lo. Tun hnai khan Lawngtlai DC, Central YLA, Mizoram police leh Assam Rifles-te'n a huhoin an chhiar nawn leh a, chhungkua 54-ah raltlan mi 219 an chhinchhiah. Mizorama raltlana lut zinga a zatve vel chu Myanmar ram a rálmuan leh deuh hnuah an kîr leh nghal thung.

Zakhai hnam raltlan ṭhenkhat chuan an rama lêt an châk tawh loh thu an sawi a, "Chhungkaw khawsakna tur leh dam khaw­chhuahna khawpa hna thawh tur a awm lo," an ti. Myanmar ráltlan, tuna Hmawngbuchhuaha la awm mekte hian an ram lama lêt an hreh hle nia sawi a ni.

Thu dawn danin, Myanmar raltlante awmna Hmawngbu­chhuah khuaah hian Zo hnah­thlak an awm lo a, awm mekte chu ráltlân Zakhai hnam vek an ni. Sakhaw lam thilah, Buddhist biak-in a awm a, sakhaw dang biak-in a awm lo a; sikul a awm a, chutah chuan Myanmar lam mite ṭawngin an inzirtir ṭhin a ni.