China-a inhlawh tur vanduaina tâwk

Siaha district-a Niawhtlang-III khaw mi pali - mipa pathum leh hmeichhia pakhat chu tun hnai khan Myanmar kaltlanga China-a inhlawh tuma an kalnaah an agent-in a bum a, Dingdi Hmeichhe Insuihkhawm Pawl (DHIP), Myanmar-te'n an chhanchhuak.

He thil kal zelah hian DHIP chuan June 20, 2019 khan Niawhtlangah kalchilhin, mihringa sumdawnna chungchang inzirtirna, anti-human trafficking awareness an buatsaih. DHIP secretary Lalramthari chuan, Mizoram aṭanga China, Thailand leh Singapore-ah dan loa lut mi za chuangte'n harsatna an tâwk tawh ṭhin thu sawiin, harsatna tâwkte chu Yangon Zofa Ṭhalai Pawl (YZṬP), Young Zofa Ṭhalai Pawl (YZṬP) leh Young Zofa Organisation of Myanmar (YZOM) ten theihtawp chhuahin an harsatna an chinfelsak tawh ṭhin thu a sawi.

Lalramthari sawi dan­in, dan loa ram páwna kal tum an awm fo a; Niawhtlanga mi pali pawh tun hnaiah inhlawhna ṭha zawk beiseiin an neih zawng zawng hralhin China-ah kal an tum a, China ram chhung Chin Shwe How an thlenin an agent-in agent fee an pek nen a tlanbosan a, DHIP-in theihtawp chhuahin an chhanchhuak a ni.

Niawhtlangah hian DHIP adviser Lalchhuanmawia chuan, Mizorama Mizote chu Myanmar ram chhungah chuan zalen takin an zin thei tih sawiin, "Harsatna an tâwk a nih pawhin eng lai pawhin ṭanpui kan hnial lo. Mahse, dan loa Myanmar ram páwna an chhuah chiah hian buaina hmachhawn thei an ni a, hetiang hi a tàwp theih nan Mizoram hmun hrang hrangah awareness training kan buatsaih zel dawn a ni," a ti.