Kânghmun South-in Serchhip dist.-a awm an duh

Lunglei district-a awm mek Kâng­hmun South khawtlang chuan resolution siamin, Serchhip district-a beh an duh thu an puang. 

Kanghmun South khuaa V/C, YMA, MUP leh MHIP hruaitute leh politi­cal party leh kohhran hrang hrang aiawhte chuan June 25, Thawhṭanni zan khan an khaw community hall-ah joint meeting an nei a, YMA president Lalramnghakmawia'n a kaihhruai.

Joint  meeting chuan, Mizoram sorkar­in district thar a siam chu lawmawm an tih thu an sawi rualin, "Kanghmun South hi kawng hrang hranga thlirin, Serchhip district-ah awm ngei kan duh a, Serchhip district-ah kan awm theih nan a ṭul anga a tàwp thlenga hmalak kan tum a ni," an ti.

Meeting chuan, a ṭul angte bawhzui turin Joint Action Committee an din a; "Mizoram Chief Minister leh sorkar mi pawimawhte hnenah an ngenna thlen a, sawipui nghal ni se," an ti. An hmalakna hmasa atan tun kar Inrinni, June 29 zana kohhran hrang hrang inkhawmah an duhnate Pathian hnena thlena ṭawngṭai rual an tum a ni.

A hmuna tlawhtu Liantluanga Ren­thlei, editor, Vantawng chanchinbu sawi danin, Kanghmun South khua hi Thenzawl aṭanga km. 15-a hlá leh Serchhip aṭanga km. 45 vela hláa awm a ni a; sor­kar department paruk - School Education, FCS&CA, Health & Family Welfare, Environment, Forest and Climate Change, Social Welfare (ICDS) leh Postal (central) department-te awmin, chu'ngte chu Thenzawl hnuaiah an awm a ni.

Pawl hrang hrang - YMA, MHIP, MUP leh football association-ah pawh Thenzawl, Serchhip district hnuaiah vek an awm a; kohhran lamah pawh Thenzawla pastor bial hnuaiah an awm bawk. An awmna district headquarters dawr turin hmun hla zawk Lunglei pan a buaithlak avang leh an tan phurrit a tlin avangin hun rei tawh tak aṭangin Serchhip district-a beh an duh thu an lo au chhuahpui tawh a; Vantawng Group YMA conference-ah pawh Serchhip district-a an awm theih nan hmalak an lo rél tawh ṭhin a ni.