Vanglaini logo

18.75% sum Finance dept-ah dah Agriculture & allied-ah 3.38% chiah

Kum 2021-22 atana Mizoram budget (estimate) Demand for Grants 2021-2022-a tarlan cheng nuai 11,33,088.78 aṭanga department hrang hrangte sum chan tur tarlanah Finance department-ah sum tam berin, cheng nuai 2,12,463.16 dah a ni a, a pumpui aṭangin 18.75% a tling.  Hetihlai hian kuthnathawktute kaihhnawih department-ah 3.38% dah a ni thung.

Kuthnathawk­tute kaihhnawih (Agriculture and allied) depart-ment panga - Agri­culture, Horticulture, Animal Husbandry and Veteri­nary, Sericulture leh Fisheries department-tea sum dah belhkhawm hi 3.38% chiah a ni a; heng department pangate belhkhawm aia sum dah tamna department mal 10 a awm.

Chief minister leh Finance enkawltu Zoramthanga'n March 1, 2021-a a pharh tâk kum 2021-22 atana Mizoram budget (estimate) chu cheng vbc. 11,148.89 a ni a, Assembly House-a pass kher ngai lote nen chuan cheng vbc. 11,330.88 (nuai 11,33,088.78) a ni thung.

Cheng nuai 11,33,088.78 hi Demand for Grants 2021-2022-a tarlan angin, department hrang hrangte bakah, autonomous body-te tana sum ruahman belh­khawm a ni. 

Demand for Grants-a a lan danin, Finance department dawta sum dah tamna ber chu School Education niin, cheng nuai 153033.70 dah a ni a, chu chu a pumpui aṭangin 13.51% a tling. 

Sum dah tam lama pathumna Home department-ah cheng nuai 76,046.73 (6.71%), palina Power & Electricity-ah 70,472.48 (6.22%) leh pangana Health & Family Welfare department-ah nuai 62,373.62 (5.50%) dah a ni.

Cheng nuai sing khat aia tam dahna department 15 a awm a; chu'ngte chu sum dah tam zualna department pangate bakah - LAD-ah nuai 10,044.79, Higher & Technical Education-ah nuai 27492.63, PHE-ah nuai 46,399.95, District Council & Minority Affairs-ah nuai 45106.49, Social Welfare-ah nuai 15,463.98, Agriculture-ah nuai 18,422.75, EFCC department-ah nuai 21,797.59, Rural Development-ah nuai 43,845.32 leh UDPA-ah nuai 42,628.62 a ni.

Cheng nuai sang khat dah tlin lohna dept panga - Parliamentary Affairs cheng nuai 89.80, Infor-mation & Commu­nication Technology nuai 459.27, DPAR nuai 491.84, Vigilance nuai 985.03 leh Fisheries nuai 988.25-te a awm.

Kuthna­thawk­tute kaihhnawih depart­ment (Agri­culture and allied) pangaa sum dah zat belh­khawm chu cheng nuai 3,83,36.29 niin, a pumpui aṭangin 3.38% a ni. 

Agriculture leh a kaihhnawih department pangatea sum dah dan chu - Agriculture-ah nuai 18,422.75 dah a ni a, chu chu demand/ budget pumpui aṭangin 1.63% a ni.

 Horticulture department-ah nuai 8,978.49 (0.79%, AH&Vety-ah nuai 7,943.30 (0.70%), Sericul-ture-ah nuai 2,003.50 (0.18%) leh Fisheries-ah nuai 988.25 (0.09%) dah a ni bawk. 

Agriculture & allied depart­ment pangaa sum dah belh­khawm aia sum dah tamna department mal 10 a awm a; chu'ngte chu - Finance (nuai 2,12,463.16), School Education (nuai 1,53,033.70), Home (nuai 76,046.73), Power & Electricity (nuai 70,472.48), Health (nuai 62,373.62), PWD (nuai 55,921.20), PHE (nuai 46,399.95), District Council & Minority Affairs (nuai 45106.49), Rural Development (nuai 43,845.32) leh UDPA (nuai 42,628.62)-te a ni.