KHAWTHLIR

PWD changtu chief minister Zoramthanga chuan INC member KT Rokhaw zawhna chhangin, December 15, 2018-a sorkar thar lâk luh a nih khan ministry hmasa Congress sorkarin kawngpui siamna atan Mizoram PWD-ah cheng nuai 8,595.19 an hnutchhiah thu Assembly House a hrilh.

Nimin khan Aijal Club-ah Aizawl páwn lama chengte'n tui thianghlim an neih theihna tura buatsaih Jal Jeevan Mission (JJM) hnuaia pump operator-te tan training buatsaih a ni a, PHE superintending engineer Lalrammawia'n a hmanpui. Training-ah hian Mamit, Kolasib leh Serchhip aṭangin khawtlang hruaitute an tel a, vawiin hian Aibawk leh Sailam khaw tui laknate enpui an ni ang.

PWD changtu chief minister Zoramthanga chuan ZPM member Dr Vanlalthlana zawhna chhangin, kum 2020-21 chhungin PWD-in SEDP aṭangin cheng nuai 6,830.45 an hman thu Assembly House a hrilh a, "Restricted tender pek chhuah danah dan kalha hmalakna a awm lo," a ti. 

Thingsulthliah SIRDPR Extension Training Centre chuan nimin khan Khawzawl Zaingen YMA Hall-ah Khawzawl khawpui chhunga VC 10-a member-te tan ‘Integrating Disaster Management Plan and Solid Waste Management Plan in GPDP’ tih thupui hmangin  training an bautsaih a, vawiinah chhunzawm a ni ang. Thingsulthliah SIRDPR ETC  principal Lalthanmawia Ralte leh K Lalbuatsaiha ten training an neihpui a ni.

Mara hmeichhe pawl, Mara Chano Py (MChP) chuan nimin khan an din champha vawi 25 na an lawm. MChP Hqrs., Siaha chuan kum danga an hman ṭhin angin an branch tinte chu mi dangte tana malsawmna thlen zawngin an remchan dan anga hmang turin an chah a; branch hrang hrangte chuan an remchan angin an hmang a, ṭhenkhatah chuan zanriah an kîlho a ni.