LC-te'n vawksa leh hlawhfa man an bithliah

Aizawl City Local Council Association (ACLCA) hruaitute March 9, Thawh­lehnia ṭhukhawm chuan Aizawla vawksa man tur leh hlawhfa chhawrna man tur an bithliah a; an thuchhuak chu ngai pawimawha zâwm turin mipui an ngen.

ACLCA chuan vawksa zuar pawlte'n vawksa man an bithliahte hre chung leh veng hrang hrang dinhmunte ngaihtuah chungin Aizawla vawksa man zat tur an bithliah tih an tarlang a, "Aizawl veng tinah kalpui vek ni se," tiin, local council tinte chu an veng ṭheuhah hma la turin an chah.

Vawksa man chu a hring kg. khat Rs. 400 leh a rép khai khat Rs. 400 a ni a, vawksa rêp khai khat chu gram 700 a tling ngei tur a ni, an ti.

Aizawla veng hrang hrangah hlawhfa chhawrna rate a inan loh avangin ACLCA chuan veng hrang hranga hlawhfa chhawrna rate inang tlánga kalpui an rel a, LC-te chu an huam chhung ṭheuhah kengkawh turin an chah. Rate an siam chu - ni khatah cement mistiri hlawh Rs. 800 leh cement helper (labour) hlawh Rs. 400 a ni.

Vai mistirte'n ni khat zel anga (daily) thawk duh loa ṭheka an beisei tlat ṭhin chu ṭha lo an tih thu tarlangin ACLCA chuan, "Hei hian hnathawkte rilru a dik lo zawngin thui tak a kaihhruai theih bakah, hlawhfa rate a nghawng theia a lan avangin ACLCA chuan vai mistirite ṭheka-a hna pek a khap a ni," an ti a; vai permit chu LC-te kaltlanga pek a nih avangin ACLCA thuchhuak pawisa loa palzûtte chu an ILP tihtawpsak an nih tur thu an tarlang.

ACLCA chuan, LC zawng zawngin vai cement hna­thawkte rêng rêng ṭheka-a thawk tur an nih chuan no objection certificate (NOC) sign lo turin an chah a, "ACLCA-in thuchhuah a siam ngai pawimawh hrâm turin mipui kan ngen a, hna thawh tur neite'n vai cement mistirite ṭhekáa hna pe lo turin kan inngen a ni," an ti.