COVID-19: Mizoram dinhmun Hripui vei mi 2 hmuh belh a ni

March 9, Thawhlehni khan Mizoramah Covid-19 vei mi pahnih hmuh chhuah a ni a, nimin khan hripui laka fihlim tawh chhuahtir an awm lo.

Covid-19 vei hmuh tharte chu RAT hmanga Aizawl leh Saitual district-a hmuh chhuah an ni a; ZMC laboratory leh TrueNAT-PCR hmanga swab sample endik zingah hripui vei hmuh chhuah an awm lo thung.

Hripui vei hmuh thar pakhat chu Champhai Vengthlanga mipa kum 50, Aizawla private hospital-a inentira a kalnaa hmuh chhuah a ni a, hri a kàina hriat a ni lo a, symptom a nei lo. Pakhat dang pawh Champhai mi tho, mipa kum 46 a ni a, Manipur aṭanga haw, state ramri Tuivai screening point-a hmuh chhuah niin, symptom nei lo a ni.

Mizoramah Covid-19 vei mi 4,434 hmuh chhuah a ni tawh a, mipa 3,234 leh hmeichhia 1,200 an ni. Nimin tlai dar 5 thleng khan mi 4,415 (99.57%) chhuahtir an ni tawh a, mi 10 (0.23%) thi tawhin, enkawl mek mi pakua (0.20%) an awm. 

Thawhlehni khan ZMC laboratory-ah RT-PCR hmangin swab sample 26, TrueNAT-PCR hmangin Lungleiah sample pahnih leh RAT hmangin district pakuaah sample 632 endik a ni a; sample endik zawng zawng chu 660 niin, chu'ng aṭanga Covid-19 positive hmuh chhuah pahnih chu 0.30% a ni.

March 9, 2021 thlenga Mizorama swab sample endik tawh zat chu 2,39,750 a ni a, chu'ng aṭanga Covid-19 positive hmuh tawh zat 4,434 chu 1.85% a ni. Hripui vei hmuh tawh zinga mi 2,117 chu Mizoram chhunga kái chhâwng an ni a, mi 2,317 chu Mizoram páwn aṭanga an rawn luh hnua hmuh chhuah an ni thung.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,657 hmuh chhuah a ni tawh a, TrueNAT-PCR hmangin 673 leh RAT hmangin 1,103 hmuh chhuah a ni tawh.

Tun dinhmunah hripui vei enkawl mekte chu tualchhung mi vek an ni a; Mizorama district 11 zinga pakua - Lunglei, Siaha, Champhai, Kolasib, Serchhip, Lawngtlai, Mamit, Khawzawl leh Hnahthial district-ahte Covid-19 vei an awm tawh rih lo. Aizawl leh Saitual district-ah chiah hripui vei enkawl an awm tawh a ni.