Vanglaini logo

NREGA material component kalpui danah RD Minister leh MLA ngaihdan a inang lo

Nimina Assembly session-ah Congress Legislature Party (CLP) leader Zodintluanga Ralte chuan, MGNREGA hnuaia material component ṭhen sawm loh a duh thu a sawi chhuak a; Rural Deve­lopment minister Lalruat­kima erawh chuan, State Employment Guarantee Council thu anga kal an nih thu a sawi thung.

Zodintluanga Ralte chuan, MGNREGA hnuaia sum sanction chu thingtlang mite'n an hnathawh hlawh atan 60% leh thingtlang mite'n an huam chhung an tihchangtlunna tur (material component) atan 40%-ah ṭhen a nih thu a sawi a, "Material component atana sum ruahmanna hi ṭhen sawmin, village employ­ment council (VEC)-ah 30% chiah dah a ni a, district employment council (DEC)-ah 40% leh block employment council (BEC)-ah 30% dah a ni," a ti.

CLP Leader chuan, material component kalphung chu RD Minister-in a hmingchhiat phah a hlauhthawn thu sawiin, "25% chu Minister-ah a lut a, '25% an la' tih sawi a tam ṭan. Material component hi ṭhen hrang loin, a area mipuite thawh­tir mai turin hma a la thei ang em? Siaha Bialtu MLA PS chuan BDO hnenah Minister direction anga material component thawk tur a thlen a ni," a ti a; material component chu hnung thak inhiahsakna leh sum siamna atana hman ṭha a tih loh thu a sawi a ni.

RD Minister chuan, an kalphung chu State Employment Guarantee Council rêl a nih avangin duh ang anga kalpui theih a ni lo tih sawiin, "VEC kutah  60% a awm tho mai avangin, remchang tur zawk leh indaih dan zawk ngaihtuah neih vanga tih a ni. A hnathawktu tur chu DEC, BEC leh VEC-te tho an ni a, an mis­tiri chhawr tur leh zelah thuràwn inpek vak ngaih­na awm lo. Kawng lehlama ngaihtuah chuan party worker-te induhsak ve zeuh zeuh cháng a awm a nih pawhin, mistiri ṭheuh ṭheuhah duh zawng thlang ang kha a ni mai," a ti. 

CLP Leader-in Siaha Bialtu MLA PS thil tih dan a sawi chungchangah Lalruatkima chuan, mistiri tur a propose nia a ngaih thu sawiin, "Lak kher tur tihnaah ka ngai lo," a ti a; mistiri a lo thiam deuh a nih chuan minister leh MLA-ah induhsak deuh a àwm thu a sawi a ni.