PWD-ah hna a huna zawh loh 192 awm A huna zawh dan dap zel a ni ang - CM

Nimin Assembly session-ah ZPM Legislature Party leader Vanlalhlana chuan, PWD hnuaiah hna a huna zawh loh 192 a awm thu a sawi chhuak. Hemi chungchangah hian PWD changtu chief minister Zoramthanga chuan, hnate chu a huna zawh dan dap zel a nih tur thu House a hrilh.

Vanlalhlana chuan, a zawhna chhàn a nih danin, department 22-ah a hun taka hna zawh loh a awm tih sawiin, "PWD bikah a huna zawh loh hna 192 a awm a, kawng laih leh in sak a ni tlangpui. A amount a sang hlawm hle. A hun taka zawh a ni lo hi engtin nge hmalak tum a nih? Extend hian estimate revise a keng tel em, a hunah eng nge zawh a nih loh chhan?" tiin zawhna a siam a ni.

Chief Minister chuan, a huna hna zawh loh a tam tih sawiin, "Project buaipui chhungin thil mante a lo to a, revise-te a ngai ṭhin. Ruahsur hian min tibuai nasa bawk a, hriat lâwk loh leimin nasate a awm ṭhin. Vai ram aṭangtein an rawn chháng a, hniam takin. Pek loh chuan Court-ah an kal dawn si. An rawn thlen meuh chuan an zuam leh ṭhin lo. Theihtawpin a huna zawh a nih theih dan kan dap zel ang," a ti.

MNF member Dr K Pachhunga zawhna a chhannaah Zoramthanga chuan, KMMTTP kawng chu kum 11 kal taah laih ṭan a nih thu sawiin, "Kawng laih lian thamah harsatna ber chu compensation a ni ṭhin. Kawng laihin compensation a lêt aia tamtein a pung chho a ni. Mahse, tunah chuan km. khat leh a chanve vel a zím lai tih loh chu a tlang thei," a ti a, June 2021 hmaa laih zawh tur a nih thu a sawi.

Chief Minister chuan, India lamah tlang mah se, Myanmar lamah a tlang loh chuan KMMTTP chuan awmzia a nei lo tih sawiin, "Ministry of External Affairs lamin Akyap thleng lai turin Myanmar sorkarah pawisa a pe. Contractor-te'n an huphurh lo khawp a, mahse, an lai ṭan a, Arakan Army hoin 10% vel chhiahte dilin, an kidnap hnuah chuan an rawn kal a ni. Theihtawp kan chhuahpui hnuah an lai ṭan leh tawh," a ti.

Hel nena inkungkaihna nei anga ngai an awm theih thu sawiin CM Zorama chuan, "India sorkar leh Myanmar sorkar hriatpuina thlapa bia ka ni. Manmohan Singh khan hmarchhaka helna a reh theihna atan ke pên turin min ti a, Narendra Modi pawhin mi ti tho," a ti a; hel chungchangah Myanmar ramah pawh tirh a lo nih tawh avangin Arakan Army-te pawhin pa angin an en a, an thusawi an zawm thu a sawi.

Chief Minister chuan, Saisihchhuah kaltlanga Myanmar nena insumdawn tawnna tura pawimawh, Mizoram chhunga Pangkhua-Saisihchhuah kawng siamna atan NEC-ah sum an dil thu a sawi a, "Saisihchhuaha lei dawhna tur pawh kan dil tel a, a tam tham deuh avangin an remti lo. Kawng laihna bik atan cheng vbc. 66.08 an sanction a ni,"  a ti.