Mizorama lut tur tana kaihhruaina

State páwn aṭanga Mizorama lut turte tana inkaihhruaina hman lai chu Home department chuan a tidanglam a, nimin khan inkaihhruaina tihdanglam dan 

a tichhuak.

Sorkar thuchhuah tarlan danin, thlawhtheihna leh lirthei hmanga Mizorama lut turte chu mCOVID-19 mobile application / www.mcovid19.mizoram.gov.in website-ah mPASS Flight emaw mPASS Road-ah emaw an in register ang a, pawmpuina (approval) nghah ngai loin mPASS ID an dawng nghal dawn a ni.

mPASS ID hmang chuan Mizoramah luh theih a ni ang a, thlawhtheihna hmanga lutte chu registration an tih fel hnuah chauh Lengpui Airport chhuahsan phalsak an ni ang.

Mizorama lut tur, ILP guidelines hman mekin ILP mamawh zinga a chhiar telte chuan Lengpui Airport / checkgate / Mizoram House-ahte temporary ILP an la thei a; mPASS Flight / mPASS Road tifel tawhte tan registration tih nawn a ngai lo.

Mizorama lut turte'n entry point-ah medical screening/Covid-19 test an paltlang a ngai a, India ram páwn aṭanga Mizorama hawte chu inkhung hran zel tur a la ni bawk.