Kuhva rah central kut a nihna lai thui tak awm - Commerce Minister

Commerce & Industries minister Dr R Lalthangliana chuan, Myanmar aṭanga Mizoram kaltlanga kuhva rah phurh chungchangah, kuhva rah chu sorkar laipui kut a nihna lai thui tak a awm niin a sawi.

ZPM member Dr Vanlalthlana chuan, mipui rilru tibuai thei khawpin kuhva rah hmanga sumdawnna kalpui a nih thu sawiin, "Department-in engtin nge hmalak a tum, allocation of business-ah a awm a ni," tiin Commerce & Industries Minister a zawt a ni.

Dr R Lalthangliana chuan, kuhva rah chu an department item a nih loh thu sawiin, "Kan hriatpui thui lutuk lo. Central kut a nihna lai thui tak a awm tih hriat a ngai," a ti.

MNF member Lalrintluanga Sailo zawhna chhangin C&I Minister chuan, Bungmual ram, West Phailenga lung awmte lak chhuah a nih theihna atan a panna tur kawng laih nan department-in estimate cheng nuai 125 a siam tawh thu a sawi a, "Industrial Development Board-ah thehluh a ni a, ngaihtuah mek a ni," a ti a, hmalak ṭan hun tur sawi theih a nih loh thu a sawi.