Cheng nuai 3 sem thuai turin phût

ZPM Ṭhalai chuan thuchhuah siamin, MNF kaihhruai sorkar hotute chu mi dang sawichhiat buaipui chiam lo a, an intiam anga cheng nuai thum sem thuai turin an phût tih an tarlang.

ZPM ṭhalaite chuan, CM Zoramthanga kaihhruai MNF sorkar chu a duhna leh a ngaihtuah zawngah chuan a chak hle tih sawiin, "A ngaihtuah zawng erawh mi dang chhiatna tura beih chauh a nih avangin a chakna hi Zoram mipui tan chhawrna tur a awm loh bàkah, mipuite tana harsatna siamtu mai a ni," an ti.

SEDP atana budget-a sum dah a kum tèlin a tlem tial tial tih sawiin ZPM Ṭhalai chuan, "Cheng nuai thum sem tura intiam a, an sorkar tûka budget-ah cheng vbc. 1,500 dah intiamtu khan, an thutiam chu an ngaihsak zawng a nih loh tâk avangin kuminah chuan SEDP-ah cheng vbc. 400 chauh an dah ta a ni," an ti a; chutih lai chuan, Serchhip bialah chuan mipui hnenah Lalduhoma sawichhiatna leh ZPM MLA-te dâwta puhna bu an sem chhuak mek tih an tarlang.