Myanmar tan ṭawngṭai dawn

Myanmar sipaite'n mipui thlan sorkar paihthlaa thuneihna an inpek avanga an rama buaina avangin Mizoram Synod chuan March 14, Pathianni hian Myanmar ram leh mipui tana ṭawngṭai rual turin an kohhrante an ngen.

Synod thuchhuak (circular) chuan, Myanmar sorkar paihthlak a ni te, chumi duh loh lantira mipui  pungkhawmte sipaiin an kâp te, pawisawi lo thi leh hliam eng emaw zat an awmte chu pawi an tih thu a tarlang a, "Kan ringtupui, Kristiante leh kohhrante a nghawng lo thei lo a, kan Mizopuite rálṭi leh hrehawm takin an awm mek a ni," an ti.

Mizoram Synod chuan March 14, Pathianni chhuna inkhawmah koh­hran tinte ṭawngṭai rual turin an ngen a; ṭawngṭai thupui turte an tichhuak nghal a ni.