Inkhawmah zai phal a ni leh lo

Mizoram sorkar chuan nimin khan thuchhuah siamin Pathian biak inkhawmnaa zai phalna thuchhuah an siam hnuah zai an phal loh thu an chhuah leh a, "Inkhawm chhungin zai leh hla sak phal a ni lo," a ti.

Disaster Management & Reha­bilitation secretary chuan March 10-ah thuchhuah siamin inkhawmnaa zai phal loh thu hi a tichhuak a, hei bakah hian Sunday School chu pawlah inṭhen loin pulpit aṭangin emaw khaikhawm tura tih a ni.

Kar khatah zan hnih aia tam lo inkhawm phal a ni a, inkhawm laiin boruak thianghlim a tam thei ang ber a luh theihna turin tukverh leh kawngkharte hawn vek tura tih a ni.

March 9-a health minister Dr R Lalthangliana hoa mi pawimawhte ṭhukhawm chuan Covid-19 dinhmun an thlirin, "Mizoram COVID-19 dinhmun uluk taka an sawiho hnuah boruakin ziaawm lam a pan zel nia a lan avangin kar khatah zan hnih Pathian biak inkhawm neih tawh ni se an ti a, biak ina Pathian faka zaiho pawh phal tawh ni se an ti," tiin sorkar thuchhuah chuan a tarlang a; nimahsela State Executive Committee on State Disaster Management-in inkaihhruaina a tihchhuahah inkhawma zai hi an remti leh ta lo a ni.