Ruihhlo dona ni-ah ruihhlo hâl ral a ni

Nimin June 26 kha 'International Day against Drug Abuse & Illicit Trafficking' a ni. Damdawi hman sual leh ruihhlo dona ní hi Mizoram hmun hrang hrangah hman a ni a, ruihhlo man tawh leh chinfel tawh tam tham tak hâl ral a ni.

International Day against Drug Abuse & Illicit Trafficking denchhen hian Excise & Narcotics department (END) chuan nimin khan Aizawl Zoological Park (Sahuan)-a thil hâl ralna (incinerator)-ah kum 2017-2019 chhunga ruihhlo an man, case 318 aṭanga chinfel tawhte chu an hal a, END secretary KT Beicho-a'n a dep kái a ni. Ruihhlo hâl ralte chu a vaiin tualchhunga hralhna rate angin, Rs. 5,47,26,485 man a tling.

Mizoram Police pawhin nimin vek khan International Day Against Drugs Abuse and Illicit Trafficking an hmang a, Aizawl Zoological Park-ah ruihhlo Rs. 52,28,967 man an hâl ral a, chung'te chu heroin gram 1545.68, ganja kg. 8.5 leh pseudoephedrine (khehpuam) kg. 31.731 a ni. Ruihhlo hâl ralnaah hian DIG (CID) Neihchungnunga leh CID (Crime) SP Lalhuliana Fanai te pawh an tel.

Aizawla police-te chuan nimin vek khan sikul hrang hrangah ruihhlo ṭhat lohna leh hlauhawmzia inzirtirna hun an hmang a, khawlaiah banner eng emaw zat an târ. District khawpui zawng zawng leh khaw dang ṭhenkhatah awareness campaign an buatsaih a; Operation Grand neiin, ruihhlo leh zu do beihpui an thlak bawk.

Champhaiah pawh additional district session judge R Vanlalena leh SP Rex Zarzoliana Vanchhawng hoin heroin leh ganja cheng nuai 75.97 hû an hâl ral a ni. United Nations Organisation (UNO) General Assembly chuan June 26 hi International Day against Drug Abuse & Illicit Trafficking atan December 7, 1987-ah a puang a, kum 1988-ah hman ṭan a ni.

June 26 thlan a nih chhan chu - Chinese mi ropui Lin Zexu-a'n China rama ruihhlo tawlh a do vanga kum 1839-1842 chhunga Opium War chhuak ta hriatrengna atan a ni a; a hman dan leh thupui turte chu United Nations Office on Drugs and Crime (UNODC)-in a buaipui ṭhin a, kumina thupui chu 'Health for Justice, Justice for Health' (Rorelna dik nei turin hriselna a pawimawh a, hriselna nei turin rorelna dik a pawimawh) 

tih a ni.