Kawng siam ṭha turin theihtawp kan chhuah dawn - CM Zorama

PWD changtu chief minister Zoramthanga chuan, Mizoram chhunga kawngpuite siamṭha turin theihtawp an chhuah tur thu nimina Assembly session-ah a sawi.

Zawhna hrang hrang a chhannaah Chief Minister chuan, sorkarna an siam veleh kawng siamṭhat hna a theih chin chinah an thawh nghal thu a sawi a, "Duh anga hna kan thawh chak theih loh chhan chu roadroller kan tlâkchham vang a ni. Roadroller hi lei belh kan tum a, inthlan avangin Model Code of Conduct-in min nang zui a, kan lei thei lo. Mahse, kawng hi eng emaw zat chu kan siam hman," a ti.

Zoramthanga chuan, kawng thar siam lama hmalakna chu thukhatah dahin, kawng awm sa siamṭhat chu a theih chin chinah an tih phawt thu sawiin, "PWD-in kan enkawl loh kawngte pawh a neitu chu Mizote tho kan nih avangin state PWD-in a theih ang angin an siamṭha zel a ni," a ti a; kawng siam hna chak taka thawh a nih theih nan sorkar leh department-in hma an lak tur thu a sawi.

Khawzawl leh Tualpui inkar kawng siam a muan thu sawi a nih chungchangah Chief Minister chuan, "Department lamin uluk takin kan ngaihtuah ang. Contractor-te'n an ti thei ngang lo a nih chuan cancel sak a ngai. Hna in cancel sak hian hnathawh leh dawnin hun a duh rei ṭhin. Eng nge ṭha ber ang tih ngaihtuah a ngai khawp mai," a ti.