LADC-ah sorkar thar a piang dawn

Lai Autonomous District Council (LADC)-a MNF MDC (member of district council) pariat, Congress MDC pali leh independent MDC pakhat chuan nimin khan United Legislature Party (ULP) an din. Hei vang hian LADC-ah sorkar a inthlak dawn.

ULP hian nimin zing khan MNF Gen.hqrs. treasurer Vanlalzawma leh general secretary TC Pachhunga te hriatpuinain Lawngtlai Circuit House-ah leader atan LADC sorkarna chelh mektu Congress sorkara chairman ni lai V Zirsanga an thlang a; deputy leader atan MNF MDC Manghmunga Chinzah an thlang bawk.

V Zirsanga bakah hian Congress MDC zinga ULP-a telte chu - executive member (EM) ni lai Lallawmsanga Apetow, deputy chief whip ni lai ST Laldailova leh CEM hlui VL Hmuaka te an ni. ULP zawmtu independent MDC chu LR Dingliana Chinzah a ni a, ani hi MADC deputy chairman ṭang lai a ni.

Lawngtlai district MNF president Manghmunga Chinzah chuan, langtlang sorkar an din tur thu sawiin, "Sorkar thar din turin a rang thei ang berin Governor-ah thu kan thlen ang," a ti. LADC-ah hian MDC elected seat 25 a awm a, Congress MDC 16, MNF MDC pariat leh independent MDC pakhat an awm. Congress party hian independent MDC nen MDC 17 neiin sorkarna an siam a; nimahsela sorkar laia MDC panga - Congress MDC pali leh independent MDC-te chu ULP-a an tel tâk avangin sorkar a inthlak dawn a ni.

ULP-in MDC 13 neiin Congress-in MDC 12 an nei mek a; hei bakah hian nominated MDC pathum an awm a, anni hian sorkar bûknaah vote an thlak ve thei lo.