Assembly budget session a ṭiak ta Member-te ṭhahnemngaihnain rah ṭha A chhuah ngei ka ring - Speaker

June 12, 2019-a neih ṭan Mizoram Legislative Assembly pariatna session ṭum thumna, budget session hmasa ber chu nimin khan a ṭiak ta a; chhun dar 12:30 velah Speaker-in tiam chin awm loin a titawp. Speaker Lalrinliana Sailo chuan, Assembly member-te ṭhahnemngaihnain rah ṭha a chhuah ngei a rin thu a sawi.

Assembly session-ah hian nimin khan zawhna leh chhanna hun hman zawh a nih hnuah, Commerce & Industries minister Dr R Lalthangliana'n 'Seperate Audit Report of the Comptroller & Auditor General of India on the Account of the Mizoram Khadi and Village Industries Board, Aizawl for the Year Ended 31 March, 2017' a pharh.

Chumi hnuah Labour, Employment, Skill Development and Entrepreneurship (LESDE) minister Lalchhandama Ralte-in 'Copy of the Mizoram Youth Commission Rules, 2019' a pharh leh bawk. Session tawp ní hian bill pathum pass a ni a; chungte chu - chief minister Zoramthanga put luh, 'The Mizoram (Repeal of Certain Enactments) Bill, 2019' te, Higher & Technical Education minister Dr R Lalthangliana put luh 'ICFAI Univerity (Mizoram) (Amendment) Bill, 2019' te leh, Land Revenue & Settlement minister Lalruatkima put luh 'The Mizoram (Land Revenue) (Amendment) Bill, 2019' te a ni.

Speaker Lalrinliana Sailo chuan, Pathian khawngaihna avangin hlim takin session an hman zawh theih thu a sawi a, "Ka lawm em emna chu, budget session-a hlimawm ber leh kan nuih tamna ber a ni hial mai thei. Ṭawngkam hriam deuh sawi chhuah a awm lo. Eptu leh ruling lamte ngaihthlak nuam takin an inchháng a ni," a ti.

Session apianga tih tura ruat List of Business ṭha taka zawh theih zel a nih thu sawiin Speaker chuan, "Lok Sabha leh Rajya Sabha bakah, state dang tam takah an ti ve thei lo. State dangte entawntlak kan ni a, i chhawm nung zel ang u," a ti a; member-te'n ṭhahnemngai taka an thawhna chuan rah ṭha a chhuah ngei a beisei thu a sawi a ni.

•    Kum 2019-20 atana Mizoram budget pass a ni.

•    Report paruk pharh a ni.

•    House-a chhan chi zawhna (starred question) 392 a lut a, 384 pawmin, pariat hnâwl a ni. Starred question 215 zinga 65 chu House-ah chhan hman a ni a, 150 an chhang hman lo.

•    Zawhna ziaka chhan chi (unstarred question) 93 a lut a, pathum hnawlin zawhna 90 pawm a ni.

•    Paper 20 pharh a ni.

•    Private member resolution 38 a lut a, chung zinga pahnih chu sawihoa pass ve ve a ni.

•    MLA lo ni tawh ṭhin mi pali sûn an ni.