HC-in 31.8.2019 hmaa inthlang turin MHIP a hriattir

MHIP General Headquarters kaihhnawih thubuaiah Gauhati High Court, Aizawl Bench-in nimin khan thutlukna a siam a; MHIP Gen. Hqrs. chu August 31, 2019 ral hmaa inthlang turin a hriattir.

Tarlan tawh angin, April 17, 2019-a MHIP Gen. Hqrs. office bearer thlanna neih tur chu secret ballot-te tihchingpen a awma hriat a nih avangin MHIP member pakhat Rohmingliani'n a khing a, inthlan hma ní - April 16-ah Aizawl District Court-in a 'stay' a, chumi hnuah June thla tîr lam khan MHIP Gen. Hqrs. OB-te chu ṭhiatin, an seal-te Court-a thehlut turin a hriattir a ni.

MHIP Gen. Hqrs. chu Gauhati High Court-ah an zualko a, High Court chuan June 25 khan order chhuahin, District Court-in MHIP Gen. Hqrs. chungchanga order a siam tawh chu a ṭhiat (suspend) a ni. High Court chuan nimin khan thubuai a ngaihtuah leh a; Rohmingliani ukil T Lalnunsiama leh MHIP Gen. Hqrs. lam ukil B Lalramenga te thu ngaihthlak a nih hnuah Gauhati High Court chuan nimin khan thuremna a siam ta a ni.

High Court thultukna ang chuan, August 31, 2019 ral hmain MHIP Gen. Hqrs. OB thlanna buatsaih tur a ni a, MHIP Coordination Committee-in inthlanpuitu tur NGO lian deuh dang aṭangin an sáwm ang a; MHIP Gen. Hqrs. Executive Committee-in nomination an siam tawh chu an duh chuan an tidanglam thei ang.

Coordination Commit-tee-in secret ballot hmanga nomination siam hun a ruat ang a, secret ballot chu Firms & Societies Registrar emaw, a aiawha a ruat office-ah dahin seal (kalh) tur a ni a, a chahbi pawh Registrar-in a kawl ang. Ballot box chu inthlan ní tura ruat thlen hma chawlhkar khat talah hawn tur a ni a, hawn laiin MHIP Gen. Hqrs. leh Rohmingliani te aiawh pakhat ve ve an tel tur a ni.