Assam Riffle-te insawn hun tur a hriat loh - Home Minister

Home minister Lalchamliana chuan ZPM member pahnih Lalchhuanthanga leh VL Zaithanzama te zawhna inṭâwm ziaka chhangin, Assam Rifle-te Aizawl khawpui lailí aṭanga Zokhawsanga an insawn hun tur hriat a nih loh thu a tarlang.

Home Minister tarlan danin, Ministry of Home Affairs thuchhuak angin Assam Rifles-te chu May 31, 2019 hmaa Zokhawsanga insawn tura tih an ni. Mahse, Zokhawsanga Assam Rifles building pawimawh zualte an hnena hlan a la nih loh avangin an insawn hun tur sawi theih a ni lo.

Assam Rifles complex sak hna hi Ministry of Home Affairs-in EPIL (PSU) a thawhtir a, anni hian building pawimawh zual ṭhenkhat leh building panna kawng an la siam zawh loh avangin an la insawn thei lo. EPIL-in building an la sak zawh loh avang leh sak zawh tawhte sawisel a nih avangin Assam Rifle-te hi an la insawn thei lo a ni.