S. Lungpher-in doctor chhuak tur an dang

Lawngtlai district-a South Lungpher khua damdawi-in, primary health centre (PHC)-a doctor awm chhun, Dr Lalchamliana chu Thingsai PHC-a awm turin sawn a ni a; Dr Lalchamliana'n nimina South Lungpher a chhuahsan tur chu khawtlang mipuiin an dang.

Thu dawn danin, South Lungpher khaw mipuite'n an khaw doctor chhuak tur an dan chhan hi - amah thlaktu tur sorkarin a dah loh vang a ni. Dr Lalchamliana thlaktu tur ruahmanna awm loa sorkarin sawn chhuah a tum chu South Lungpher khua chauh ni lo, a chhehvel khua mipuite ngaihsak lohnaah an ngai a, doctor chhuak tur chu an dang ta a ni.

South Lungpher Joint Committee chuan, an khaw damdawi-ina awm tur doctor dah a nih hma chuan doctor awm sa sawn chhuah leh doctor-in PHC complex a chhuahsan an rem ti dawn lo tih an puang bawk. Thlâktu awm loa doctor sawn chhuah tum chungchangah hian South Lungpher-a tlawmngai pawlte leh political party zawng zawng telna Joint Committee chuan, lamkal intirin, an khawtlangin doctor an mamawhzia leh thawktu an indaih loh dante sorkarah an thlen tawh niin an tarlang.

Thu dawn danin, South Lungpher PHC hi an khaw mipuite bakah, Vawmbûk, Archhuang, Ṭialdawngilung, Siachangkâwn, Rawlbûk, Cheuràl, Lungtian leh Phalhrang khaw mipuite'n damdawi-in an pan ber a ni.