KHAWTHLIR

CTI, Sesawnga Martarte Lungphun champha vawi 22-na pualin Mizoram Pradesh Youth Congress Committee (MPYCC) chuan nimin khan lungphunah hun an hmang a, hnam tana martarte hriatreng nan pangpar an dah. MPYCC president Dr Lalmalsawma chuan, nationalism chu ṭawngka ringawtah a awm loh thu leh sorkar laia thil tihah a lan ṭhin thu a sawi a, "Mizote zinga Mizo nationalism a taka vawng nungtu leh chawi nungtu chu Congress kan ni," a ti. Martarte Lungphun hi kum 1997-ah Congress ṭhalai hmalaknaa phun a ni a, ft. 35-a sang a ni.

Mizoram Civil Service Association (MCSA) chuan vawiin chawhma dar 10 aṭangin Beraw-tlang Tourist Complex-ah General Conference vawi 44-na an hmang ṭan dawn a, Home minister Lalchamliana khuallian a ni ang.

MNF ṭhalaite chuan thuchhuah siamin, "June 12, 2019 aṭanga neih ṭan, Mizoram State Assembly budget session, vawiin June 27, 2019 thlenga tluang taka neih a ni hi lawmawm kan ti a, Pu Zoramthanga kaihhruai MNF ministry-in Mizoram enkawl dan tura ruahmanna an siamte ṭha kan ti a, Mizoramin hmel thar kan hmuh ngei pawh kan beisei," an ti. 

Excise & Narcotics minister Dr K Beichhua chuan MNF member Lalrinsanga Ralte zawhna chhangin, zu khapna dan kengkawh turin Excise & Narcotics department-a thawkte an indaih lo hle tih House a hrilh a, "Post ruakte hnawhkhah tum a ni a, tunah hian sorkarah post awm sa bak dil belh mek a ni. Inter state border Bairabi leh international border Zokhawtharahte outpost siam belh tum a ni," a ti.

Champhai Ṭhalai Pawl (CṬP) chuan an khaw tihmingṭhatu footballer pathum, ISL leh I-League club-a khel - Lalthuammawia Ralte, Lalruatthara leh Lalchhawnkima te chu nimin khan Hotel Hranga Plaza-ah an chawimawi. Chawimawi inkhawm hi CṬP president Lalnunsanga Fanai-in a kaihruai a, Champhai District MJA president C Lalhnunpuia'n thu a sawi a ni.