Health Index-ah Mizoram a sang ber Congress sorkar thawh rah a ni - MPCC

Congress party chuan, Niti Aayog-in India ram state leh union territory hrang hrangte hrisel dan tehna - Health Index Second Edition, June 25, 2019-a a tih chhuah tharah state tê zingah Mizoram chu state hrisel bera puan a nih thu an tarlang a, "Kum 10 chhunga Pu Lal Thanhawla kaihhruai Congress sorkar hnathawh rah a ni," an ti.

Mizoram Pradesh Congress Committee (MPCC) tarlan danin, Health Index chu Union Health Ministry leh World Bank-te nen ṭangruala Niti Aayog-in an siam a ni a; Health Index hmasa, First Edition-ah pawh Mizoram chu state tê zingah pakhatna a lo ni tawh.

Health Index tehnaah hian kum hnih chhung, 2015-16 aṭanga 2017-18 chhunga hriselna dinhmun teh a ni a; tehna 23 zingah - nau piang hlim dam chhuah ṭhat dan leh thi tam dan (mortality rate) te, hmeichhia kum 15-49 inkar, nau nei rualte nau neih dan tehna (total fertility rate) te, nau piang zinga mipa leh hmeichhe awm zat (sex ratio)-te ngaih pawimawh zual a ni. Nau piang rih záwng te, natna laka invenna (immunization) pek dan te, HIV veite damdawi pek dante a tel bawk.

Tehna hrang hrangah hian Mizoram chuan point 73.70 a hmu a, state tê zingah point hmu sang ber a ni. Mizoram hnaih bertu Manipur-in point 57.78 an hmu a, pathumna Meghalaya-in point 56.83 an hmu thung. Mizoram hian 2015-16 khan point 71.27 a lo hmuh tawh a, hmasawn zawngin a kal a ni.

MPCC chuan, Health Index 2nd. Edition tih chhuah taka Mizoram dinhmun chuan hriselna lama Congress party kaihhruai sorkarin kum 10 kal ta chhunga hna a thawh ṭhatzia a tarlang chiang hlea an ngaih thu an sawi a, "Health Minister hluite leh Health department-a thawktu zawng zawngte thawhrimna zár liau liau niin kan ngai," an ti.

Congress party chuan, "Mizorama Pu Lal Thanhawla kaihhruai ministry liam tain hriselna leh kawng hrang hrang, a bikin economic lama hmasawnna atana hna a thawh ṭhatzia hi tehna hrang hrangah a lang chho zel dawn," an ti a; Congress sorkarin sorkar hnathawk lakna dik taka a kalpui ṭhin dan te, sum leh pai enkawlna, zirna, infiamna leh kawng hrang hranga hmasawnna a thlen nasat dante chu hre nawn fo turin mipui an ngen a ni.