MZU Southern Campus din turin Sorkar laipuiah mutàn a awm

Higher & Technical Education (HTE) minister Dr R Lalthangliana chuan, Mizoram University, Southern Campus, Lungleia din turin sorkar laipuiah mutàn a la awm thu a sawi.

MNF member Dr Vanlalṭanpuia zawhna chhangin Dr R Lalthang­liana chuan, MZU Southern Campus, Lungleia din a nih theih nan MZU Academic Council chuan MZU insawhngheh hnua hmachhawp atan a dah thu a sawi a, "Ministry of Human Resources Development-ah vawi tam tak lehkha a thawn tawh a, tun thlengin chhanna duhawm dawn a la awm lo," a ti.

HTE Minister chuan, MZU Southern Campus din chu Mizoram sorkar thuneihna a ni chiah lo tih sawiin, "MZU duhsakna kan dawng a, tuna Vice Chancellor pawh hian ṭan a la nasa. Kumin February thla vel khan Ministry of Human Resources Development Minister pawh ka hmu a, a thuphungin MZU Southern Campus hi din min tiam a, tunah minister an inthlak leh tawh si a, chhuahchhalh theih pawh a ni lo," a ti a; remchang hmasa berah chak taka an bawhzui tur thu a sawi.

Dr Vanlalṭanpuia chuan, National Institute of Technology (NIT) Mizoram chu rei tak hlam­chhiah a nih thu sawiin, "Director pawh thla khatah ni nga emaw vel chauh a awm tih report ka dawng. Central-in direct-a a enkawl a ni a, a buai­thlak khawp mai. Kum 8 velah pawh campus an nei thei lo a, ranking pawh a nei pha tawh lo," a ti. Dr Vanlalṭanpuia thu-sawi chungchangah hian Dr R Lalthangliana chuan NIT hi en ṭhat a ngaih thu a sawi.