National Statistics Day hman a ni

Nimin khan Directorate of Economic and Statistics-ah National Statistics Day 2019 chu hman a ni. Khuallian, State Planning Board vice chairman H Rammawi chuan, hmasawnna hna thawh dawnin data a pawimawh thu a sawi.

H Rammawi chuan, tun hmain Mizoramah data mumal a awm ṭhin loh avangin hmasawnna tura ruahmannate a taka kalpui a har ṭhin tih sawiin, "Eng hna pawh thawk dawn ila, thawh dan, kalpui dan tur leh a awmziate hriat chian phawt a ngai a, hengte hi data ṭha leh mumal tel loin tih theih a ni lo," a ti.

H Rammawi hian Economic and Statistics buatsaih Medical Certification of Causes of Death (MCCCD), Mizoram 2018 leh Annual Report Registration of Births and Deaths, Mizoram 2018 a tlangzarh nghal a ni. Planning secretary Dr C Vanlalramsanga pawhin thu sawiin, National Statistics Day thupui 'Sustainable Development Goals' ah Mizoram chu India ramah hma la ṭha ber pawl a nih thu a sawi a, "Mizoram hi SDG dashboard siamna atan pawh a thawh hlawk hle. NITI Aayog-in baseline index a tih­chhuahah Mizoram hi a ti ṭha pawl a ni a, India ram pumah 6-na a ni mek," a ti.