Sairanga rêl chawlhhmun turah Hmunhma ngaihven turin ngen

ZPM ṭhalaite chuan thu­chhuah siamin, Sairanga rêl chawlhhmun tur siam mekah, Mizoram himna atan a ṭul anga hma la a, an hmunhma tur buaipui thuai turin sorkar an ngen.

ZPM ṭhalai tarlan dan­in, Assembly session nimina neih zawh takah ZPM member Lalchhuanthanga'n June 19, 2019-ah zawhna, 'Sairang rel station-ah i) Excise & Narcotics, ii) Taxation, iii) Customs leh, iv) ILP (Home) department-te'n check gate siam turin hmalakna an nei tawh em?' tih chu a siam a. Transport minister TJ Lalnun­tluanga chuan, Excise & Narcotics department-in an hmun tur an la hmuh loh thu leh, Taxation, Customs leh ILP (Home) department-te chuan hmalakna an la neih loh thuin a chháng a ni.

ZPM ṭhalaite chuan, Sairang thlenga rél a lo luh hunah Mizote chu kawng hrang hranga chîmral an nih loh nan political platform-ah leh tlawmngai pawl leh khaw­tlangahte inzirtirna kalpui mek a ni tih an sawi a, "Chutih laia dái theu tura ngaih department-te'n check gate siamna tura a hmun tur an la nei lo leh department pathumin hmalakna an la nei lo hi a pawi hle. Check gate siamna hmun tur neih nan hma la thuai se kan duh a ni," an ti.