MZP huaihawtin Remna Ni lawm a ni

June 30, Pathiannia lo thleng tur Remna Ni chu Mizo Zirlai Pawl (MZP) buatsaihin nimin khan Lammualah lawm a ni a, chief minister Zoramthanga khuallian niin, political party hrang hrangte'n an hmanpui a, zirlai ṭhahnem tak an tel bawk. Chief Minister chuan, remna chu Mizoram hmasawnna atan hmang turin mipui a sáwm.

Chief Minister chuan, Mizo-ram chu kum 30 chuang remna ngêlnghet hnuaiah a awm ta tih sawiin, "Kan remna hi a nghet a, ṭhenawm state leh ram dangte pawhin min lawmpui a, min awt bawk a ni," a ti a; remna humhim zel tur leh hmang thiam turin Mizo mipuite a chah.

Zoramthanga chuan, MNF leh India sorkar inremna chu a tu emaw ber duh ang taka siam a ni lo tih sawiin, "MNF duh ang taka siam a ni lo a, India sorkar duh ang taka siam pawh a ni lo a, Zoram mipui duh ang taka siam a ni hek lo. Kan pawm tlân theih, kan sírtlûkna angin inremna hi siam a ni a, chu chu a ṭha tawk titu chu kan Pathian a nih kan ring. India sorkar duh dan ang tak ni lo, Mizo mipui duh dan ang tak ni lo, Pathianin a duh danin remna min pe a ni," a ti.

MNF President sawi danin, kum 1966-a ram a buai tirh aṭangin remna siam turin kohhran, NGO, political party, zirlai pawl leh mi ṭhahnemngaite'n hma an la nghal. Ramhnuai sorkar leh India sorkar mumal taka an inbiakna hmasa ber chu March 1971-ah neih a ni a, a hnuah Afganistan-ah vawi rûk inbiak a nih bakah, Europe ram hrang hrangah inbiak zel a ni. A lang apaua inbiakna nei turin MNF hotute chu January 24, 1976-ah India ramah an lut a, March 1976-ah khawvel hriatin inbiakna neih a ni.

Zoramthanga chuan, MNF leh India sorkar inbiak chhung zawngin kohhran, pawl, zirlai leh mi hrang hrangin hma an la a, Mizoram mipui nasa takin Pathian hnenah an ṭawngṭai tih a sawi a, "Harsatna tinrêng karah June 30, 1986-ah inremna ziah a lo ni ta a, a ropui hle. Inremna champha lâwm theiin kan awm a, Pathian hnenah lawmthu kan sawi tur a ni," a ti.

Chief Minister chuan, Remna Ní hi a nêp leh nuihzat zawnga sawinate a awm tawh ṭhin tih sawiin, "Tunah erawh chuan ṭhangtharte thinlungah ngaih pawimawhna a lian chho a, an nuihzat duh tawh lo," a ti. Hmasawn nan remna a pawimawh tih sawiin, "Remna hi Zoram hmasawnna atan i hmang ang u. Remna tel lo chuan hmasawnna a kal thei lo," a ti bawk.

MZP president L Ramdinliana Renthlei chuan, MZP-in a ngaih pawimawh ber chu, ram leh hnam himna leh Zo fate inkara inlungrualna leh inunauna ṭha a awm a nih thu a sawi a, "Kan hnam history-a ni chhinchhiah tlak kan neih hi theihnghilh mai lo a, Remna Ni hian kan ram leh hnam hmangaihna rilru thar min puttirin, Zo fate thinlungah zalenna leh remna leh muanna hlutzia a tharin min hriat chhuahtir fo se tih hi MZP duh dan a ni," a ti a; Pathianin rem a tih hunah Zo fate chu rorelna pakhat hnuaiah an la awm ngei an beisei tlat thu a sawi.

Nimina Remna Ni lawmnaah hian rambuai thim chhah tak lak aṭanga Mizoramin remna a hmuh theihna atana thawh hlâwk nia an hriat mi pali hnenah MZP chuan chawimawina an hlan a; chu'ngte chu - Rev. Dr Zairema, Rev. Dr HS Luaia, Rev. Dr Lalngurauva Ralte leh Lalduhoma, MLA-te an ni.

Inkhawmah hian NGO Coordination Committee aiawh te, Congress party, ZPM, BJP leh PRISM party aiawhte'n thu an sawi a; zaipawl leh mimal zaithiamte an zai bakah, hnam làm leh lemchante entir a ni.