Mizoram MP-in Parliament session-ah Thlawhtheihnaa harsatna a sawi chhuak

Ronald Sapa Tlau chuan nimin khan Parliament (Rajya Sabha) session zero hour-ah hun a hmang a; boruaka inkalpawhna (air connectivity) lama Mizoramin harsatna a tawh mek leh Aizawl (Lengpui Airport) leh Kolkata inkara thlawhna chuan man to bik lutuk chungchang a sawi chhuak.

Nimina Rajya Sabha session-ah hian Ronald Sapa hi chawhma 11:15 velah dingin, zero hour hun hmang hmasa a ni a; thla ruk chhung chu air connectivity-ah Aizawl/Mizoram dinhmun a chhiat hle tawh thu sawiin, "Ni tin thlawhna pakhat chauh a thlawk a, chubakah chuan chawlhkar khatah ni thum dang additional flight a awm; ni khata thlawhtheihna pakua thlawhna Agartala leh pali an thlawhna Imphal-te nen a inthlau hle. Ni tin ticket chang lo mi tam tak an awm reng a ni," a ti.

Ronald Sapa Tlau chuan, thlawhtheihna thlâwk a tlem bakah, ticket man hmun dangte aia a to bik lutuk chu mipui phurrit a nih thu sawiin, "Kolkata-Aizawl hi minute 55 thlawk a ni a, thlawhna chuan man Rs. 15,000 velte a ni. A tlukpui hmun dangah chuan Rs. 5,000 velte a ni thung," a ti. Mizoram chu hmun kilkhawr, boruaka inkalpawhna ṭha mamawh tak a nih avang leh mipuiin nasa taka harsatna an tawh mek sukiang turin sorkar chu a rang thei ang bera hma la turin a ngen a ni.

Ronald Sapa Tlau-in thu a sawi hma chiah hian House Chairman-in, 'House chhunga member zahawm tak takte'n issue hrang hrang an sawi hi a changtu minister an awm loh apiangin House Leader-in thlen ngei ngei turin ka hriattir nawn leh e," tiin a sawi.