MBBS leh BDS zir turte thlanna Rules hman tur hriat theih a la ni lo

Higher & Technical Education (HTE)-a Technical Wing chuan nimin khan National Eligibility cum Entrance Test (NEET)-a Mizoram aṭanga inziak tlingte an târ chhuak. Hetih lai hian, MBBS leh BDS thlanna atan eng rules nge hman a nih dawn hriat a la ni lo.

HTE Technical Wing hotute hnen aṭanga Vanglaini thu dawn danin, NEET-ah hian Mizoram aṭangin mi 595 an tling a, chu'ng zinga 15 chu hnam dang an ni. NEET paltlang tan chauh state quota-in MBBS leh BDS zir theih a ni tawh.

Hriat theih chinah Mizoramin MBBS seat 84 a nei a, central pool-a seat awm zat tur hriat a la ni lo. MBBS seat 84 zinga 70 chu Zoram Medical College (ZMC) / MIMER-ah a ni a, a bak chu NEC hnuaia seat hmuh ṭhin a ni. BDS-ah pawh central pool hnuaia seat neih zat tur hriat a la ni lo a, NEC-ah seat pasarih hmuh a ni.

Mizoram aṭangin mi 977-in NEET an hma chhawn a, an zinga 595 an tling. India ram pumah NEET hi mi nuai 15 chuangin an hmachhawn a, Mizoram aṭanga ti ṭha ber chu India ram pumah 1,051-na a ni. Vanglaini palai zawhna chhangin HTE hotute chuan, MBBS leh BDS zir tur thlanna atana rules hman tur an la hriat loh thu an sawi a, "NEET-a tlingte hi kan târ chhuak phawt a ni," an ti.

Tarlan tawh angin, Gauhati High Court (GHC), Aizawl Bench-in The Mizoram (Selection of Candidates for Higher Technical Courses) Rules, 2016 chungchanga thutlukna a siam chu Mizoram sorkarin Supreme Court-ah an khing a ni. Hemi chungchangah hian Supreme Court chuan thutlukna a la siam lo.

The Mizoram (Selection of Candidates for Higher Technical Courses) Rules, 2016-ah Chakma-te category-I ah dah an nih loh avangin Mizoram Chakma Students' Union (MCSU) chuan High Court-ah PIL an thehlut a ni.

High Court chuan tribal ṭheuh ṭheuh chu ang khata inen turin thutlukna a siam a; Court thutlukna ang chuan, Chakma-te chu Category-I ah dah a ngai. High Court thutlukna chu duh loin Mizoram sorkar chu Supreme Court-ah an zualko ve leh a ni.